Suomi.fi -siidduin dieđut almmolaš bálvalusain dál maiddái nuortalaš-, anáraš- ja davvisámegillii

Suomi.fi-neahttabálvalussii leat čohkkejuvvon dieđut almmolašhálddahusa bálvalusain nuortalaš-, anáraš- ja davvisámegillii. Suomi.fi maiddái stivre fállojuvvon sámegiel almmolaš bálvalusaide, mii doarju áššiiddikšuma iežas gielain. Dasa lassin Suomi.fi-dieđut doaibmá boahtteáiggis golmma sámegillii. 

Suomi.fi -siidduin oažžu dieđuid maiddái bálvalusain iešguđet sámegielaiguin

Suomi.fi -siidduin gávdno sámegillii diehtu juo sullii 180 almmolaš bálvalusas. Dasa lassin siiddus muitaluvvo earret eará Digi- ja álbmotdiehtodoaimmahaga, Eallinfápmoguovddáža, Kela ja Lappi buresveadjinguovllu sámegillii fállojuvvon bálvalusain.

Ulbmilin lea oažžut ain eanet organisašuvnnaid mielde almmustahttit dieđuid sin bálvalusain Suomi.fi -siidduin sámegielaiguin, vai dat gávdnojit boahtteáiggis viidábut ovtta sajis. Dasa lassin ulbmilin lea čohkket oktii sierra sámegielaiguin fállojuvvon bálvalusaid, vai sámegiel áššehasat gávdnet álkibut bálvalusaid iežaset gielaiguin.

Maiddái Suomi.fi-dieđuid sáhttá geavahit sámegillii

Nuortalaš-, anáraš- ja davvisámegielat rávvagat Suomi.fi-dieđuid geavahussii leat leamaš oažžumis juo jagi áigge. Dál Suomi.fi-dieđuid sáhttá maiddái geavahit daiguin sámegielaiguin. Maŋŋelis dán giđa Suomi.fi-dieđuid sáhttá maid váldit adnui sámegillii.

– Suomi.fi-dieđuid geavahus nuortalaš-, anáraš- ja davvisámegillii lihkostuvvá vuos dušše Suomi.fi-neahttabálvalusa bokte. Maŋŋelabbos lea dárkkuhus almmustahttit maiddái Suomi.fi-mobiilaheivehusa sámegillii ja maid fállat vejolašvuođa vuostáiváldit Suomi.fi- dieđuin boahtti e-poastaalmmuhusaid sámegillii, muitala Suomi.fi-dieđuid bálvalanoamasteaddji Maria Juka-Lahdenperä Digi- ja álbmotdiehtodoaimmahagas.

Virgeoapmahaččat sáhttet maiddái sáddet Suomi.fi-dieđuid sámegillii.

Ovttasbargu doarju sámegiel bálvalusaid ovddideami

Sámegiel bálvalanozu buvttadeapmi lea ovddiduvvon ovttasráđiid Digi- ja álbmotdiehtodoaimmahagain, Sámedikkiin ja Mii ovttas -fierpmádagain. Dainna ulbmilin lea álkidahttit sámegiel bálvalusaid gávdnoma ja maid sámegiel áššehasaid vejolašvuođa oažžut dieđu almmolaš bálvalusain sámegillii.  

– Mii leat Sámedikkis ilolaččat Digi- ja álbmotdiehtodoaimmahagain álgán ovttasbarggus. Ovttasbargu nanne sámegiel bálvalusaid oinnolašvuođa ja ráhkada konkrehtalaččat ođđa sámegiel digibálvalusaid, dadjá Sámedikki ságadoalli sadjásaš Tuomas Aslak Juuso.

Suomi.fi lea Digi- ja álbmotdiehtodoaimmahaga bajásdoallan bálvalus, mii veahkeha ja rávve álbmotlahtuid ja fitnodagaid árgga áššiiddikšumis virgeoapmahaččaiguin ja almmolaččat ávkkálaš organisašuvnnaiguin.

– Suomi.fi lea buorre báiki sámegiel áššehasaide gávdnat almmolaš bálvalusaid iežas gillii.  Mii roahkasmahttit buot virgeoapmahaččaid almmustahttit maiddái ovttaskas sámegiel bálvalusaidis, mat gávdnojit juo, Suomi.fi -siidduin. Dieđusge mii doaivut maiddái, ahte virgeoapmahaččat ovddidivčče lasi bálvalusaid iešguđet sámegielaide, muitala áššedovdi Nina West Digi- ja álbmotdiehtodoaimmahagas.

Lassidieđut

• Sámegiel sisdoalut Suomi.fi -siidduin 
• Suomi.fist tiäđuh almos palvâlusâin tääl meid nuorttâlâš-, anarâš- já orjâlâškielân
• Suomi.fist teâđ õõlmâs kääzzkõõzzin ååʹn še nuõrtt-, aanar- da tâʹvvsääʹmǩiõʹlle

Mii lea Suomi.fi-dieđut?

• davvisámegillii
• anárašgillii
• nuortalašgillii

Digi- ja álbmotdiehtodoaimmahat ovddida servodaga digitališuvnna, sihkkarastá dieđuid oažžuma ja fállá bálvalusaid áššehasaid eallima dáhpáhusaide. Dat fuolaha álbmotdiehtovuogádaga, mii lea servodaga vuođđun, bajásdoallamis. Doaimmahahkii heivehuvvo sámi giellaláhka ja sámiin lea vuoigatvuohta geavahit sámegiela áššiid divššodettiin.

Sámediggi lea sámiid virggálaš ovddasteaddji. Dat hábme sámiid virggálaš oainnu ja ráđđádallá virgeoapmahaččaiguin. Sámediggi bajásdoallá ja ovddida buot golmma Suomas ealli sámegiela, buot sámiid árbevirolaš ealáhusaid ja sámekultuvrra ja -eallinvuogi.