Virgeoapmahašpoasta rievdá eanaš elektrovnnalažžan: dieđuid ja doarjaga fállet álbmotlahtuide

Riikkabeaivvit dohkkehii 11.3.2026 láhkanuppástusaid, maid mielde sii, geat dikšot áššiid digitálalaččat, ožžot virgeoapmahaččaid poastta dás duohko álgovurrosaččat digitálalaččat. Buohkain lea ain vejolašvuohta oažžut virgeoapmahašpoastta báberhámis. Sii, geat eai vuos divššo áššiid digitálalaččat, eai dárbbaš bargat maidege. Nuppástus eaktuda vel lágaid nannema ja boađášii fápmui cuoŋománu 14. beaivve 2026.

Go láhka lea boahtán fápmui, olmmoš guhte čáliha sisa virgeoapmahačča muhtin digitála bálvalussii, láidestuvvo váldit atnui Suomi.fi‑dieđuid. Digitála poastakássa ráhkaduvvo álo olbmo identitehta nana duođašteami bokte, iige dat boađe atnui automáhtalaččat duogážis dahje nu, ahte olmmoš ieš ii dieđe.

– ”Juo badjel 2,6 miljovnna olbmo geavahit Suomi.fi‑dieđuid, ja go láhka boahtá fápmui, Suomi.fi‑dieđut bohtet atnui vel lagabui 1,8 miljovnna olbmui – oktiibuot badjel njeallje miljovnna olbmui”, muitala fidnohoavda Annette Hotari Digi‑ ja álbmotdiehtodoaimmahagas.
 
Álgovurrosaččat digitála virgeoapmahašpoasta ii guoskka vuolleahkásaččaide, sidjiide geat leat ávkegoziheami vuolde iige sidjiide, geain lea nannejuvvon ávkegozihanfápmudus. Nuppástus ii maiddái oidno sidjiide, geat geavahit juo Suomi.fi‑dieđuid.

– ”Mii háliidit odjodahttalit sin, geaid nuppástus váivvida: juos ii geavat virgeoapmahaččaid digibálvalusaid dahje identitehta nana duođašteami reaidduid, mihkkige ii rievdda ja virgeoapmahaččaid poasta boahtá dás duohkoge báberhámis. Sierra almmuhusa Digi- ja álbmotdiehtodoaimmahahkii dahje eará virgeoapmahaččaide ii dárbbaš dahkat,” Hotari dadjá.

Sáhttá máhccat báberpostii ovtta jahkái hávális 

Juos olmmoš geavaha digibálvalusaid ja háliida geavahišgoahtit fas báberpoastta Suomi.fi-dieđuid atnuiváldima maŋŋá, dan sáhttá dahkat. Válljejumi sáhttá ieš dahkat Suomi.fi-dieđuid válljenásahusain. Virgeoapmahaččaid poasta ii boađe seammá áigge sihke báberreiven ja elektrovnnalaččat. 

Válljejupmi gusto 365 beaivvi hávális. Dán áigodaga siste virgeoapmahaččaid poasta sáddejuvvo báberreiven. Go mearreáigi dievvá ja olmmoš čáliha sisa vuosttamuš geardde virgeoapmahačča digitála bálvalussii, su láidestit váldit atnui Suomi.fi-dieđuid ođđasit atnui. Suomi.fi-dieđut eai šatta aktiivvalažžan automáhtalaččat duogážis.

Dieđuid ja doarjaga fállet telefovnna, webináraid ja dilálašvuođaid bokte

Digi- ja álbmotdiehtodoaimmahat fállá doarjaga nuppástussii máŋgga láhkai. Juos gažaldat guoská digitála virgeoapmahašpostii dahje Suomi.fi-dieđuid geavaheapmái, veahki oažžu maid telefovnnain Suomi.fi-bálvalusaid rávvenbálvalusas. Dárbbu mielde telefovnnain sáhttá maid várret áiggi Digi- ja álbmotdiehtodoaimmahaga áššiiddikšumii báikki alde. Juos gažaldat laktása áššái, mii lea gieđahallamis, doarjaga addá dat virgeoapmahaš, geainna olmmoš dikšu áššiid.

Mii áinnas muitalit nuppástusain eambbo maid iešguđet doaibmiide, fierpmádagaide ja dáhpáhusain. Mii arvvosmahttit lassin lágidit webináraid oktavuhtii báikkiid, gos sáhttá čuovvut webinára gáiddusin. Vuosttamuš webinára lágiduvvo 9.4.2026 dii 10, ja dan sáhttá čuovvut Yle Areena Avoin Areena -bálvalusa bokte. Webináras sáhttá maid ovdanbuktit gažaldagaid.

Liŋka

• Suomi.fi-dieđuid rávvagat 
• Suomi.fi-bálvalusaid rávven – Doarjja ja rávven 
• Lassidieđut: Oassálastte gáiddusdieđihandilálašvuođaide: Virgeoapmahašpoasta nuppástuvvá cuoŋománu áigge elektrovnnalažžan sidjiide, geat geavahit bálvalusaid digitálalaččat 
• Liŋka 9.4.2026 webinárii 

Lassidieđut

Digi- ja álbmotdiehtodoaimmahat, fidnohoavda Annette Hotari, [email protected]