Virgeoapmahašpoasta sirdašuvvá digihápmái – Suomi.fi-dieđut buhttejit máŋggaid virgeoapmahaččaid sádden báberreivviid

Olggosaddima áigemuddu 13.4.2026 6.55
Tiipa:Dieđáhus

Virgeoapmahašpoastta vuostáiváldin nuppástuvvá álgovurrosaččat digitálan. Go duođaštat identitehta 14.4.2026 dahje dan maŋŋá čuovvovaš háve muhtin virgeoapmahačča elektrovnnalaš áššiiddikšunbálvalussii, du láidestit váldit atnui Suomi.fi-dieđuid. Dás duohko oaččut dohko poastta máŋggain virgeoapmahaččain. Suomi.fi-dieđut buhttejit virgeoapmahaččaid sádden báberpoastta: seammá ášši ii boađe šat maŋŋelabbos reiven ruoktot.

Suomi.fi-dieđut váldojuvvojit atnui dan oktavuođas, go duođašta identitehta virgeoapmahačča bálvalusaide. Atnuiváldin gáibida iežas doaimmaid iige dat dáhpáhuva fuomáškeahttá. Juo dál badjel 2,6 miljovnna olbmo vuostáiváldet virgeoapmahašpoastta Suomi.fi-dieđuide. Dás duohko sáhttá vuordit, ahte bálvalusa geavahišgohtet ain eambbo olbmot, daningo badjel njeallje miljovnna olbmo dikšot áššiid virgeoapmahaččaiguin elektrovnnalaččat juo dál.

Mot ja geasa Suomi.fi-dieđut bohtet atnui?

– Suomi.fi-dieđut bohtet atnui, juos leat dievasahkásaš, geavahat virgeoapmahačča elektrovnnalaš áššiiddikšunbálvalusaid ja dus eai vuos leat Suomi.fi-dieđut anus. Du láidestit váldit atnui Suomi.fi-dieđuid, go duođaštat identitehta nannosit muhtin almmolaš hálddahusa áššiiddikšunbálvalussii báŋkodovddaldagaiguin, mobiilanannehusain dahje persovdnakoartta nannehusain, muitala fidnohoavda Annette Hotari Digi- ja álbmotdiehtodoaimmahagas.

Atnuiváldima oktavuođas ferte almmuhit iežas šleađgapoastačujuhusa ja nannet dan. Ná oaččut iežat šleađgapostii álo almmuhusa ođđa dieđus. Šleađgapoastačujuhusa almmuheami maŋŋá joatkkát identitehta duođašteami dábálaččat ja sirdašuvat áššiiddikšunbálvalussii, gosa ledjet mannamin.

Nuppástus ii guoskka sidjiide, geat eai geavat virgeoapmahaččaid digibálvalusaid

Juos it geavat almmolaš hálddahusa elektrovnnalaš áššiiddikšunbálvalusaid, nuppástus ii váikkut dutnje, muhto oaččut dás duohkoge virgeoapmahaččaid poastta báberpoastan.

Nuppástus ii maiddái guoskka vuolleahkásaččaide, sidjiide, geat leat ávkegoziheami vuolde iige daidda olbmuide, geain lea fámus ávkegozihanfápmudus.

Virgeoapmahašpoastta sáhttá oažžut dás duohkoge báberpoastan

Hotari muitala, ahte virgeoapmahaččaid sádden reivviid sáhttá dás duohkoge oažžut báberhámis, vaikke divššošii áššiid virgeoapmahaččain digitálalaččat.

– Sáhtát molsut reivviid doaimmahanvuohkin báberpoastta, go leat vuohččan váldán atnui Suomi.fi-dieđuid. Molsso doaimmahanvuogi Suomi.fi-dieđuid válljemiin.

Válljejupmi báberpoastta vuostáiváldimis lea fámus unnimusat ovtta jagi. Go jagi maŋŋá duođaštat identitehta čuovvovaš háve muhtin virgeoapmahačča áššiiddikšunbálvalussii, du láidestit fas váldit atnui Suomi.fi-dieđuid. Juos it duođaš identitehta, virgeoapmahašpoasta boahtá dutnje báberpoastan maiddái jagi mearreáiggi maŋŋá.

Mobiilaáppa lea álkimus vuohki lohkat boahtán dieđuid

Hotari muittuha, ahte Suomi.fi-mobiilaáppa lea geabbilamos vuohki lohkat virgeoapmahaččaid sádden poastta.

– Sáhtát lohkat virgeoapmahaččain boahtán dieđuid njuolga Suomi.fi-áppas. Áppa maid almmuha, go dohko boahtá ođđa diehtu. Dieđut bissot du mielde ja leat álkit oažžun láhkai gos ihkinassii leaččatge.

Lea dehálaš muitit sirdašuvvat lohkat ođđa dieđu álo juogo Suomi.fi-mobiilaáppas dahje čálihemiin sisa čujuhusas suomi.fi/viestit.

– Goassige ii galgga mannat lohkat dieđu šleađgapoasttain dahje teakstadieđuin boahtán liŋkkaid bokte. Suomi.fi-dieđut eai sádde teakstadieđuid dahje WhatsApp-dieđuid vuostáiváldiide. Šleađgapostii boahtá almmuhus ođđa dieđus, muhto das ii diehtodorvosivaid dihtii leat liŋka, man ávžžuhit deaddilit, dadjá Hotari.

Lassidieđut

Digi- ja álbmotdiehtodoaimmahat, fidnohoavda Annette Hotari, [email protected] 

Ná beasat lohkat Suomi.fi-dieđuide boahtán dieđuid:

  • Sáhtát lohkat dieđuid Suomi.fi-mobiilaáppain dahje duođaštemiin identitehta Suomi.fi-neahttabálvalussii ja sirdásemiin doppe čuoggái “Dieđut”.
  • Identitehta duođaštuvvo báŋkodovddaldagaiguin, mobiilanannehusain dahje persovdnakoartta elektrovnnalaš nannehusain.
  • Oaččut almmuhusa iežat šleađgapostii álo, go dutnje boahtá Suomi.fi-dieđuide ođđa diehtu.
  • Oaččut almmuhusa boahtán dieđuin maiddái Suomi.fi-mobiilaáppas, juos leat luđet áppa iežat atnui.

Bargga ná, juos háliidat máhccat báberpoastta vuostáiváldin: 

  1. Váldde atnui Suomi.fi-dieđuid, go duođaštat identitehta virgeoapmahačča neahttabálvalussii. Sáhtát máhccat báberpoastta vuostáiváldin easka dán maŋŋá.
  2. Sirdašuva Suomi.fi-dieđuide čujuhusas suomi.fi/viestit.
  3. Duođaš identitehta bálvalussii báŋkodovddaldagaiguin, mobiilanannehusain dahje persovdnakoartta nannehusain.
  4. Sirdašuva fálus čuoggái “Válljemat” ja vállje “Heaitte geavaheames Suomi.fi-dieđuid”.

Dárbbu mielde oaččut veahki maid Suomi.fi-bálvalusaid rávvemis (tlf. 0295 000). 

Juos dus lea geavahusas Suomi.fi-mobiilaáppa, hás fuomášat, ahte

  • dušše áppa sihkkun ii váldde Suomi.fi-dieđuid du geavahusas  
  • bálvalusa ferte álo váldit eret anus Suomi.fi-dieđuid válljemiin.  

Ná geavahat Suomi.fi-dieđuid dorvvolaččat:

  • Sirdašuva álo lohkat ođđa dieđu juogo Suomi.fi-mobiilaáppain dahje čálihemiin sisa čujuhusas suomi.fi/viestit. Ale deaddil liŋkkaid, mat leat boahtán šleađgapoasttain dahje teakstadieđuin.
  • Suomi.fi-dieđuid šleađgapoastaalmmuhusain eai leat liŋkkat. Suomi.fi ii sádde teakstadieđuid, WhatsApp-dieđuid dahje eará hoahppodieđuid. Šleađgapoastaalmmuhusat Suomi.fi-bálvalussii boahtán dieđuin bohtet [email protected]čujuhusas.
  • Virgeoapmahaš ii gáibit bargat hoahpus. Virgeoapmahaččat eai goassige gáibit bargat hoahpus, addit dieđuid dahje deaddilit liŋkkaid preassa vuolde.
  • Juos eahpidat behttosa, sáhtát sihkkarastit ahte diehtu lea eakti, go čálihat sisa Suomi.fi-dieđuide čujuhusas suomi.fi/viestit dahje rahpamiin Suomi.fi-áppa.
  • Čále čujuhusa ieš neahttalogana čujuhusruvdui. Ale sirdašuva bálvalussii ohcanbálvalusa bohtosiid bokte.

Ná du láidestit váldit atnui Suomi.fi-dieđuid, go duođaštat identitehta almmolaš hálddahusa elektrovnnalaš bálvalusaide:

​​​​​​​

Lassidiehtoliŋkkat

Mat leat Suomi.fi-dieđut?

Suomi.fi-dieđut leat diehtodorvvolaš elektrovnnalaš poastakássa, mii buhtte virgeoapmahašpoastta, mii boahtá báberpoastan. Bálvalusa geavahit máŋggat virgeoapmahaččat ja mearri stuorru oppa áigge. Boahtán dieđuid sáhttá lohkat Suomi.fi-mobiilaáppain dahje duođaštemiin identitehta Suomi.fi-neahttabálvalussii čujuhusas suomi.fi. Ná boahtán poastta sáhttá lohkat gos beare, gos fal leatge. 

Suomi.fi-dieđuid oaččut atnui, go luđet Suomi.fi-mobiilaáppa dahje duođaštat identitehta čujuhusas suomi.fi/viestit. Identitehta sáhttá duođaštit báŋkodovddaldagaiguin, mobiilanannehusain dahje persovdnakoartta elektrovnnalaš nannehusain. Go válddát Suomi.fi-dieđuid atnui, oaččut dás duohko maid máŋggaid iešguđet virgeoapmahaččaid sádden poastta elektrovnnalaččat.

Almmuhusat ođđa dieđuin bohtet šleađgapoastačujuhussii, man leat almmuhan bálvalussii. Suomi.fi-mobiilaáppa geavaheaddjit ožžot almmuhusa maiddái njuolga áppa bokte.

Njukčamánus 2026 Suomi.fi-dieđuid geavahedje juo badjel 2,6 miljovnna olbmo.

Lassidieđut Suomi.fi-dieđuin: suomi.fi/fi/diedut

 

Mas lea sáhka digitála virgeoapmahašgulahallamii sirdašuvvamis?

Virgeoapmahašpoastta digitála álgovurrosašvuhtii guoski láhkaásaheapmi boahtá fápmui 14.4.2026. Dán maŋŋá virgeoapmahašpoasta sáddejuvvo álgovurrosaččat digitálalaččat buohkaide, geat dikšot áššiid digitálalaččat. Dievasahkásaš olbmot, geat čálihit sisa virgeoapmahaččaid elektrovnnalaš áššiiddikšunbálvalusaide, láidestuvvojit identitehta duođašteami oktavuođas váldit atnui Suomi.fi-dieđuid, juos bálvalus ii leat sidjiide juo oahpis.

Sii, geat eai geavat virgeoapmahaččaid digibálvalusaid, ožžot dás duohkoge virgeoapmahašpoastta báberhámis, juos eai ieža vállje nuppe láhkai. Elektrovnnalaš dieđuid vuostáiváldima sáhttá gaskkalduhttit, ja dalle dieđut sáddejuvvojit fas báberpoastan. Juos olmmoš, guhte lea válljen báberpoastta, joatká elektrovnnalaš áššiiddikšuma, su láidestit 365 beaivvi maŋŋá ođđasit váldit atnui Suomi.fi-dieđuid, go son čuovvovaš háve duođašta identitehta muhtin virgeoapmahačča elektrovnnalaš áššiiddikšunbálvalussii.

Sirdašuvvan digitála postii mielddisbuktá mearkkašahtti ávkkiid. Dat seastá servodaga váriid logiid miljovnnaid euroid ovddas jagis ja álkidahttá riikkavuložiid árgabeaivvi. 

Virgeoapmahaččaid sádden reivvet leat johtilit oažžun láhkai, gávdnojit ovtta sajis ja leat álo geavahusas.

Go láhkaásaheapmi boahtá fápmui, de virgeoapmahašpoasta doaimmahuvvo álgovurrosaččat Suomi.fi-dieđuide buohkaide, geat dikšot áššiid elektrovnnalaččat. Suomi.fi-dieđuid lassin riikkavuložiidda sáhttá ain boahtit virgeoapmahaččain poasta maiddái eará digitála kanálaide, juos olmmoš lea váldán daid atnui.

Maŋŋelabbos jagi 2026 áigge lea ulbmil, ahte olmmoš sáhtášii válljet virgeoapmahašpoastta vuostáiváldinsadjin Suomi.fi lassin maiddái muhtin eará digipoastabálvalusa, mii deavdá virgeoapmahaččaid diehtogaskkusteapmái ásahuvvon diehtodorvo- ja eará gáibádusaid. 

Válljenfriijavuođa eaktudan láhkaásahannuppástusaid ja teknihkalaš nuppástusaid leat bárrásii válmmaštallamin.

Loga eambbo: dvv.fi/digi-ensin-hanke  
Digi ensin Hankkeet-sivun uutisvirta suomi.fi-viestit