Álbmotdiehtovuogádaga diehtosuodječilgehus

Álbmotdiehtovuogádat (VTJ) lea riikkaviidosaš vuođđodiehtovuorká. Álbmotdiehtovuogádat čohkiida riikkaviidosaš diehtovuogádagas ja dain guvllolaččat ordnejuvvon diehtomateriálain, mat eai leat váldon digitála hámis diehtovuogádahkii. Álbmotdiehtovuogádat sisttisdoallá dieđuid olbmuin (sihke ealli ja jápmán olbmuin), giddodagain, ráhkadusain, lanjadagain ja hálddahuslaš guovllujuoguin. Álbmotdiehtovuogádagas leat persondieđut Suoma stáhtaborgáriin ja dakkáraš olgoriikkalaš stáhtaborgáriin, geat ásset Suomas dahje geain leat juoga eará dárbbašlaš gollosat suopmelaš servodahkii. Dieđuid registreren vuođđuduvvá virgeoapmahaččaid ja stáhtaborgáriid lágas mearriduvvon almmuhusaide. Álbmotdiehtovuogádaga dieđut geavahuvvojit oppa servodaga diehtofuolahusas, ovdamearkka dihtii álbmothálddahusas, válggaid ordnemis, vearuhusas ja riektehálddahusas sihke dutkamušas ja statistihkaid dahkamis. Maiddái fitnodagat ja servošat ožžot álbmotdiehtovuogádaga dieđuid geavahussii. Álbmotdiehtovuogádaga dieđut navdojuvvojit riektan, juos dat eai sierra čujuhuvvo feaillalažžan. Dieđuid sáhttá maiddái geavahit olbmo guoskevaš mearrádusdahkamis almmutkeahttá das sierra olbmui alcces. Dát vuođđuduvvá dasa, ahte dieđuid lea almmuhan juogo áššáigullevačča Suoma virgeoapmahaš dahje daid vurken lea vuođđuduvvan luohtehahtti olgoriikkalaš áššegirječielggadussii.