Virgeoapmahašpoasta boahtá jagi 2026 álggu rájes ovdasajis elektrovnnalaččat – nuppástus guoská sullii guovtti miljovnna olbmo
Jagis 2026 Suomi.fi-sánit boahtá atnui buot dievasahkásaččaide, geat dikšot áššiid digitálalaččat eaige leat vel váldán dan árabut atnui. Bálvalus boahtá atnui, go olmmoš duođašta identitehta vuosttas háve jagi 2026 áigge muhtun virgeoapmahačča elektrovnnalaš áššiiddikšunbálvalusas. Nuppástusa maŋŋá virgeoapmahašpoastta vuostáiváldá ovdasajis digitálalaččat badjel njealje miljovnna olbmo.
Suomi.fi-sániid atnuiváldin lea evttohuvvon virgeoapmahaččaid áššiiddikšunbálvalusaide identitehta duođašteami oktavuođas mannan miessemánu rájes ja Suomi.fi-sánit leat dál geavahusas badjel 2,2 miljovnna olbmos.
”Jagi 2026 rájes bálvalus šaddá aktiivvalažžan maiddái daidda sullii guovtti miljovnna olbmui, geat duođaštit iežaset identitehta nannosit almmolaš hálddahusa elektrovnnalaš áššiiddikšunbálvalusain, muhto geain ii leat vel ovdal leamaš Suomi.fi-dieđut geavahusas. Sierra miehtan atnuiváldimii ii šat jerrojuvvo”, muitala prošeaktahoavda Annette Hotari Digi- ja álbmotdiehtodoaimmahagas. Suomi.fi-sániid atnui boahtimis muitaluvvo identitehta duođašteami oktavuođas.
Nuppástus ii goittotge guoskka olbmuid, geat eai geavat almmolaš hálddahusa elektrovnnalaš áššiiddikšunbálvalusaid, vuolleahkásaččaid dahje sin, geain lea ovdogohccin dahje geain lea fámolaš ovdogohcinfápmudus.
Muitte čuovvut iežat ođđa poastakássa
”Suomi.fi-sánit lea álbmotlahtu elektrovnnalaš poastakássa virgeoapmahašpoasttaide. Dohko bohtet poasttat máŋgga sierra virgeoapmahaččas ja dohko boahtti sánit buhttejit báberpoastta. Boahtteáiggis máŋggat dehálaš reivet gávdnojit ovtta ja seamma bálvalusas – johtilit ja vissásit. Suomi.fi-sániide sáhttá sáddet maiddái dakkár persovdnadieđuid sisttisdoalli sániid, maid ii oaččo sáddet šleađgapoasttain”, muitala Hotari.
Sirdáseapmi báberpoastta vuostáiváldimis elektrovnnalaš virgeoapmahašpostii gáibida nuppástusaid iežas hárjánumiide. ”Elektrovnnalaš poastakássa gánneha čuovvut seamma láhkai, go fysalaš poastakássa geaidnoguoras. Oaččut almmuhusa ođđa elektrovnnalaš sánis iežat šleađgapostii. Maiddái Suomi.fi-áppa almmuha ođđa sánis, jos leat váldán áppa atnui. Digitála poastta ávkin lea, ahte dohko boahtán poasttaid sáhttá lohkat gos ja goas beare”, áiccalmahttá Hotari.
Maid jos háliida virgeoapmahašpoastta boahtteáiggisge báberpoastan?
Digitála virgeoapmahašpostii sirdáseapmi ii dárkkut dan, ahte giige ii sáhtášii boahtteáiggis vuostáiváldit virgeoapmahaččain poastta báberreiven.
”Vaikko Suomi.fi-sánit boahtá atnui identitehta duođašteami oktavuođas jagis 2026, lea geavaheaddjis, jos son háliida, vejolašvuohta sirdásit ruovttoluotta báberpoastta vuostáiváldin”, muitala Hotari.
Jos geavahusas lea Suomi.fi-áppa, lea dehálaš muitit, ahte áppa eret bidjan ii heaittit diehtobálvalusa anu. Almmuhusa máhccamis báberpoastta vuostáiváldin galgá dahkat Suomi.fi-sániid ásahusain dahje, nu ahte váldá oktavuođa Digi- ja álbmotdiehtodoaimmahaga áššehasbálvalussii. Nuppástusa sáhttá dahkat easkka Suomi.fi-sániid atnuiváldima maŋŋá jagis 2026, ii ovddalgihtii.
Válljen báberpoastta vuostáiváldimis bissu fámus jahkebeali hávil. Jos jahkebeali maŋŋá duođašta ođđasit identitehta virgeoapmahaččaid áššiiddikšunbálvalusain, Suomi.fi-sánit boahtá ođđasit atnui.
Dalle jos háliida, olmmoš sáhttá maiddái ieš goas beare váldit Suomi.fi-sániid ođđasit atnui go luđe geavahussii Suomi.fi-áppa dahje čujuhusas suomi.fi/viestit.
Láhkanuppástus válmmaštallojuvvo ruhtaministeriijas
Buot virgeoapmahaččaid sádden poasttat eai goittotge boađe digitálalaččat Suomi.fi-sániide, daningo oassi virgeoapmahaččain sáhttá geavahit elektrovnnalaš diehtojuohkimii maiddái eará digitála kanálaid. Daid birra muitaluvvo guđege organisašuvnna bálvalusa oktavuođas.
Stáhtaministeriija válmmaštallá aiddo dál láhkanuppástusa, mii attášii vuostáiváldái friijavuođa válljet, man digipoastabálvalusa bokte háliida lohkat virgeoapmahaččaid diehtunaddimiid ja eará sániid, maid virgeoapmahaččat sáddejit. Válljenfriijavuođa dahkan vejolažžan gáibida maiddái teknihkalaš ovdáneami, mat válmmaštallojit aiddo dál.
Vel jagi 2026 álggus vuostáiváldi ii sáhte ieš válljet, gos son háliida lohkat virgeoapmahaččaid sádden poasttaid. Dát vejolašvuohta lea válmmaštallamis ja ollašuvvá easkka maŋŋelabbos, jos láhkaevttohusat dohkkehuvvojit.
Lassedieđut
Digi- ja álbmotdiehtodoaimmahat, prošeaktahoavda Annette Hotari, t. 0295 535 028, [email protected]
Digi- ja álbmotdiehtodoaimmahat, Suomi.fi-sániid bálvalanoamasteaddji Maria Juka-Lahdenperä, t. 0295 535 334, [email protected]
Ávkkálaš liŋkkat
- Lassedieđut Suomi.fi-sániin: https://suomi.fi/fi/viestit (suomagillii)
- Lassedieđut Suomi.fi-identitehta duođašteamis: https://www.suomi.fi/ohjeet-ja-tuki/tunnistus/mika-on-suomifi-tunnistus (suomagillii)
- Suomi.fi-sániide poastta sáddejeaddji organisašuvnnat: https://www.suomi.fi/ohjeet-ja-tuki/viestit/suomifi-viesteja-kayttavat-organisaatiot-ja-palvelut (suomagillii)
- Ná válddán Suomi.fi-sániid eret anus: https://www.suomi.fi/ohjeet-ja-tuki/viestit/viestien-kaytto/viestien-kayton-lopettaminen (suomagillii)
Áiccalmahttingovva, mo Suomi.fi-sánit boahtá atnui nana identitehta duođašteami oassin almmolaš hálddahusa elektrovnnalaš bálvalussii jagi 2026 álggu rájes
.png/a3fb9eb1-df4a-dc35-54ad-bd338fe0d149?t=1764847986705)
Lassedieđut
Maid nuppástus oaivvilda?
- Go dievasahkásaš olmmoš duođašta identitehta jagi 2026 álggus dahje dan maŋŋá vuosttas háve muhtun almmolaš hálddahusa elektrovnnalaš áššiiddikšunbálvalusas, sutnje boahtá atnui Suomi.fi-sánit dahjege elektrovnnalaš poastakássa virgeoapmahašsániide.
- Almmolaš hálddahusa áššiiddikšunbálvalusat leat ovdamearkan gieldda, stáhta virgeoapmahačča dahje buresveadjinguovllu áššiiddikšunbálvalusat.
- Suomi.fi-sánit boahtá atnui buohkaide, geat dikšot áššiid digitálalaččat ja eai leat vel árabut váldán bálvalusa atnui.
- Suomi.fi-sániide boahtá poasta elektrovnnalaččat máŋggain sierra virgeoapmahaččain. Seamma reivvet eai šat sáddejuvvo báberpoastan.
- Jos divššot áššiid fitnodaga dahje nuppi olbmo beales, Suomi.fi-sánit boahtá atnui dutnje alccet – ii dan olbmui dahje fitnodahkii, man beales leat mannamin dikšut áššiid.
Ávkkit álbmotlahttui ja virgeoapmahažžii
Suomi.fi-sánit
- jođálmahttá ja álkidahttá diehtojuohkima
- lea álo geavahusas: sániid sáhttá lohkat gos ja goas beare
- seastá áiggi
- geahpeda almmolaš hálddahusa goluid ja báhpára geavahusa.
- almmuha ođđa virgeoapmahašpoasttas sihke šleađgapoastta ja Suomi.fi-mobiilaáppa bokte.
Naba jos háliidan báberpoastta?
- Suomi.fi-sánit ii boađe atnui, jos it geavat virgeoapmahaččaid elektrovnnalaš bálvalusaid. Dalle oaččut boahtteáiggisge virgeoapmahašpoastta báberpoastan.
- Amma fuobmát, ahte oassi virgeoapmahaččain sáhttá geavahit elektrovnnalaš diehtojuohkimii maiddái eará digitála kanálaid.
- Nuppástus ii guoskka vuolleahkásaččaid iige olbmuid, geain lea ovdogohccin.
- Suomi.fi-sániid atnuiváldima maŋŋá sáhttá sirdásit ruovttoluotta báberpostii, go nuppástahttá ásahusaid. Válljejupmi lea fámus jahkebeali ain hávil.
Mo elektrovnnalaš sániid sáhttá lohkat?
- Sáhtát lohkat Suomi.fi-sániide boahtán virgeoapmahašsániid Suomi.fi-mobiilaáppas dahje go sisačálihat Suomi.fi-neahttabálvalussii ja sirdásat doppe oassái ”Viestit” (sánit).
- Identitehta duođašteapmi dáhpáhuvvá báŋkodovddaldagaiguin, mobiilanannehusain dahje persovdnakoartta elektrovnnalaš nannehusain.
- Oaččut almmuhusa iežat šleađgapostii álo, go dutnje boahtá Suomi.fi-sániide ođđa sátni.
- Oaččut almmuhusaid boahtán sániin maiddái Suomi.fi-mobiilaáppas, jos leat luđen áppa atnui.
Sáhtát maiddái váldit Suomi.fi-sániid atnui čujuhusas https://suomi.fi/viestit dahje, nu ahte luđet atnui Suomi.fi-mobiilaáppa.
DUOGÁŠ
Mii lea Suomi.fi-sánit?
Suomi.fi-sánit lea diehtodorvvolaš elektrovnnalaš poastakássa, mii buhtte báberpoastta bokte boahtti virgeoapmahašpoastta. Bálvalusa geavahit máŋggat virgeoapmahaččat ja mearri lassána ollesáigge. Boahtán sániid sáhttá lohkat Suomi.fi-mobiilaáppain dahje, nu ahte duođašta identitehta Suomi.fi-neahttabálvalusas čujuhusas https://suomi.fi. Ná boahtán poastta sáhttá lohkat, gos beare jođátge. Suomi.fi-sániide sáhttá sáddet maiddái dakkár persovdnadieđuid sisttisdoalli sániid, maid ii oaččo sáddet šleađgapoasttain.
Almmuhusat ođđa sániin bohtet šleađgapoastačujuhussii, man geavaheaddji lea almmuhan bálvalussii. Suomi.fi-mobiilaáppa geavaheaddjit ožžot almmuhusa maiddái njuolga áppa bokte.
Golggotmánus 2025 Suomi.fi-sániid geavaha juo badjel 2,2 miljovnna olbmo.
Suomi.fi-sániid oažžu atnui go luđe Suomi.fi-mobiilaáppa dahje duođašta identitehta čujuhusas https://suomi.fi/viestit. Identitehta duođašteapmi dáhpáhuvvá báŋkodovddaldagaiguin, mobiilanannehusain dahje persovdnakoartta elektrovnnalaš nannehusain. Go váldá Suomi.fi-sániid atnui, oažžu boahtteáiggis maiddái máŋggaid sierra virgeoapmahaččaid sádden poastta elektrovnnalaččat.
Lassedieđut Suomi.fi-sániin: https://www.suomi.fi/ohjeet-ja-tuki/viestit (suomagillii)
Man birra lea gažaldat, go sirdásit digitála virgeoapmahašdiehtojuohkimii?
Suopma sirdása muttuid mielde elektrovnnalaš virgeoapmahašdiehtojuohkima guvlui. Jagi 2026 álggu rájes virgeoapmahašpoasta doaimmahuvvo ovdasajis digitálalaččat buohkaide, geat dikšot áššiid elektrovnnalaččat. Virgeoapmahaččaid elektrovnnalaš áššiiddikšunbálvalusaide sisačáliheaddji dievasahkásaš olbmot ožžot Suomi.fi-identitehta duođašteami oktavuođas almmá sierra miehtama haga atnui Suomi.fi-sániid, jos olbmos ii leat juo bálvalus geavahusas.
Sii, guđet eai sáhte geavahit digibálvalusaid, ožžot boahtteáiggisge virgeoapmahašpoastta báberpoastan, jos eai ieža vállje nuppe láhkai. Elektrovnnalaš dieđuid vuostáiváldima sáhttá maiddái gaskkalduhttit go almmuha áššis, dalle sánit sáddejuvvojit fas báberpoastan. Jos olmmoš, guhte lea válljen báberpoastta, joatká elektrovnnalaš áššiiddikšuma, sutnje ráhkaduvvo mearreáiggi maŋŋá ođđasit elektrovnnalaš poastakássa Suomi.fi-sániide.
Sirdáseapmi digitála diehtojuohkimii buktá mearkkašahtti ávkkiid. Dat seastá servodaga váriid logiid miljovnnaid euroid ovddas jagis ja álkidahttá árgga. Virgeoapmahašpoasttat leat johtilit oažžumis, gávdnojit ovtta sajis ja leat álo geavahusas.
Jagi 2026 álggu rájes virgeoapmahašpoasta doaimmahuvvo ovdasajis Suomi.fi-sániide buohkaide, geat dikšot áššiid elektrovnnalaččat. Suomi.fi-sániid lassin álbmotlahtuide sáhttá ain boahtit virgeoapmahaččain poasta maiddái eará digitála kanálaide, jos olmmoš lea váldán daid atnui.
Maŋŋelabbos jagi 2026 áigge lea dárkkuhussan, ahte olmmoš sáhtášii válljet virgeoapmahašpoastta vuostáiváldinbáikin Suomi.fi lassin maiddái muhtun eará digipoastabálvalusa, mii deavdá virgeoapmahaččaid diehtojuohkimii ásahuvvon diehtodorvo- ja eará gáibádusaid. Válljenfriijavuohta gáibida láhkaásaheami ja teknihkalaš ovdáneami, mat leat easkka álggus.
Loga lasi: https://dvv.fi/digi-ensin-hanke (suomagillii)
