Sääʹmteʹǧǧ da Digi- da meerteâttkoontâr raavee õhttsažtuâjas: Suomi.fi jååʹđat juätkast pueʹrben sääʹmǩiõllsaž kääzzkõõzzi årra

Sääʹmteeʹǧǧ da Digi- da meerteâttkonttâr (DVV) eeʹttkõõʹsti vuõinnlõʹtte Aanrest påʹrǧǧmannu looppâst. Vuõinnlõõttmõõžž teeʹmmen leäi õhttsažtuâj raavummuš di sääʹm ǩiõll-lääʹjj teâuddjummuš DVV kääzzkõõzzin.

Suomi.fi-seiddõʹsse raajât kääzzkõsooʒʒtõk sääʹmǩiõllsaž kääzzkõõzzin

Sääʹmteeʹǧǧ, DVV da Mii ovttas -säimmõõzz ääiʹjbuž saǥstõõllmõõžži puättmõššân DVV lij juʹn älggam plaaneed Suomi.fi-seiddõʹsse kääzzkõsooʒʒtõõǥǥ aanar-, nuõrtt- da tâʹvvsääʹmǩiõllsaž kääzzkõõzzin. Juʹrddjen lij, što kääzzkõsooʒʒtõõǥǥ õlmstââʹttet eeʹjj 2026 poodd.

DVV tuõʹllʼjem Suomi.fi lij ooccâmseiddõs, kååʹtt vieʹǩǩat da vuäʹppast meerlaid da põrggsid aarǥ aaʹšši håiddmõõžžâst veʹrǧǧniiʹǩǩi da takaiäukkas organisaatioivuiʹm. Ođđ kääzzkõsooʒʒtõõǥǥ vueʹrdet hiâlptem sääʹm-meer vueiʹtlvažvuõđ kaunnâd teâđaid jeeʹres verǧǧniiʹǩǩi sääʹmǩiõllsaž kääzzkõõzzin nooʹreld da lââʹzztem sääʹmǩiõllsaž kääzzkõõzzi âânnmõõžž.

Vuõinnlõõttmõõžž juätkast mieʹrrkõõski

Vuõinnlõõttmõõžžâst sueʹppeš še Sääʹmteeʹǧǧ da DVV õhttsažtuâj raavummšest da piiri-iiʹjji šõddi vuõinnlõõttmõõžžin. Sääʹmteʹǧǧ lij ääiʹjab suåppâm õhttsažtuâj raavummšest Kelain da THL:in.

- Vaaʹldim rämm-miõlin vuâstta DVV iʹlmmtõõzz Suomi.fi-neʹttkääzzkõʹsse puõʹtti sääʹmǩiõllsaž kääzzkõõzzi ooʒʒtõõǥǥâst. Tät konkreettlaž tåimm põhtt luõʹttjummuš õhttsažtuõjju da tõõzz, što DVV:st käunnai tättsââʹjj sääʹmǩiõllsaž kääzzkõõzzi ooudâsviikkmõʹšše. Sääʹmteʹǧǧ siâzztââll veʹrǧǧniiʹǩǩid valmštõõttâd raajjâd sääʹmǩiõllsaž kääzzkõõzzin aʹrvvõõzz kääzzkõsteâttvääraid sääʹmǩiõlin, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.

- Suomi.fi lij pueʹrr vuâlaž sääʹmǩiõllsaž kääzzkõõzzi noorrmõʹšše. Õõlmâs vaaldâšm kääzzkõõzzi sääʹmǩiõllsaž čiõʹlǧǧõõzzid da aʹrvvõõzzid lij juätkast hiâlpab kaunnâd nooʹreld. Äʹlǧǧep še veeideed DVV jiijjâz kääzzkõõzzi aʹrvvõõzzi taʹrjjummuž sääʹmǩiõlin, särnn pâʹjjʼjååʹđeeʹjj Timo Salovaara Digi- da meerteâttkonttrest.

Vuõinnlõõttmõʹšše vuässõʹtte Digi- da meerteâttkonttrest väʹlddjååʹđteeʹjj Janne Viskari, pâʹjjʼjååʹđeeʹj Timo Salovaara, Pekka Rehn da Noora Kallio di saaǥǥtem- da markknâsttemjååʹđteeʹjj Anna-Riitta Lund. Sääʹmteeʹǧǧest mieʹldd leʹjje saaǥǥjååʹđteeʹj sâjjsaž Tuomas Aslak Juuso, ǩiõllstaanpiisar Anne Kirste Aikio da ǩiõllaaʹššipiisar Marko Marjomaa.

Digi- da meerteâttkonttâr oouʹdad õhttsažkååʹdd digitalisaatio, tuârvv teâđai vuäǯǯamvuõđ da taʹrjjad kääzzkõõzzid äʹššniiʹǩǩi jieʹllemšõddmõõžžid. Tõt âânn huõl õhttsažkååʹdd vuâđđan åårrai meerteâttriâžldõõǥǥ tuõʹllʼjummšest. Konttra suåvldet sääʹm ǩiõll-lääʹjj da säʹmmlaid vuõiggâdvuõđ ââʹnned sääʹmǩiõl äʹššeem poodd.

Sääʹmteʹǧǧ lij säʹmmlai veerǥlaž eeʹttkõʹstti. Tõt pohtt ouʹdde säʹmmlai veerǥlaž vuäinnmõõžž da saǥstââll veʹrǧǧniiʹǩǩivuiʹm. Sääʹmteʹǧǧ tuõʹllai da veekk ooudårra puk koumm Lääʹddjânnmest jieʹlli sääʹmǩiõl, puk säʹmmlai äʹrbbvuõđlaž jieʹllemvuõʹjjid di sääʹmkulttuur da jieʹllemnääʹl. 

Lââʹssteâđ:

Saaǥǥjååʹđteeʹj sâjjsaž Tuomas Aslak Juuso, Sääʹmteʹǧǧ

Pâʹjjʼjååʹđeeʹjj Timo Salovaara, Digi- da meerteâttkoontâr