Náittoslihtus ja registrerejuvvon párragaskavuođas goabbáge beallelaččas lea náittosvuoigatvuohta nuppi opmodahkii. Jus náittoslihttu dahje registrerejuvvon párragaskavuohta nohká jogo jápmima dahje náittosearu geažil, de beallelaččaid opmodat juhkkojuvvo. Náittosvuoigatvuohta mearkkaša vuoigatvuođa oažžut beali beallelaččaid oktiirehkenastojuvvon opmodagas. Náittossoahpamušain sáhttibeahtti soahpat ahte nuppis dahje goappásge dudnos ii leat naittosvuoigatvuohta nuppi opmodahkii dahje oassái opmodagas.

Náittossoahpamuša gánnáha dahkat ášševuoddjiin, stáhta riekteveahkkedoaimmahagain dahje áššedovdi juristain. Náittossoahpamuš boahtá fápmui easkka dalle go dat lea registrerejuvvon Digi- ja álbmotdiehtodoaimmahagas. Doaimmahat ii gárvvis soahpamuša iige sáhte váldit beali dan sisdollui, baicce dušše registrere válmmaš soahpamuša.

Sáhtát doaimmahit náittossoahpamuša registrerema várás juo ovdal vihaheami dahje náittoslihtu áigge. Náittossoahpamuša ii leat vejolaš registreret dan maŋŋel go leahppi ohcan náittosearu dahje nubbi beallelaččain lea jápmán.

Náittossoahpamuša ferte dahkat čálalaččat ja dan ferte beaivádit ja vuolláičállit. Dasa lassin guokte easttahis olbmo galgaba duođaštit vuolláičállosiid eaktin.

Náittossoahpamuš registrerejuvvo dušše suoma- dahje ruoŧagillii. Sáhttibeahtti vuolláičállit earágielat náittossoahpamuša suoma- dahje ruoŧagielat soahpamuša lassin.

Jus eahppi leat čállán náittossoahpamuša suoma- dahje ruoŧagillii, dan galgá jorgalahttit auktoriserejuvvon jorgaleaddjis ovdalgo sáddebeahtti dan Digi- ja álbmotdiehtodoaimmahahkii registrerema várás.

Vihtan lea easttalaš jus náittossoahpamuša dahkki lea su

• dáláš dahje ovddeš náittos- dahje orrunguoibmi
• oabbá dahje viellja
• vánhen
• mánná
• soapmása ovdalis máinnašuvvon olbmo beallelaš.

Vihtan ferte leat deavdán 15 jagi ja son ferte ipmirdit duođašteami mearkkašumi.