Virgeomâhâšpostâ sirdoo digin – Suomi.fi-viestah šadda maaŋgâi virgeomâhái vuolgâttem pááppárreeivâi sajan
Virgeomâhâšpoostâ vuástáväldim muttoo vuosâsajasávt digitallâžžân. Ko tun tubdâttâđah 14.4.2026 tâi tast maŋa čuávuváá tove monnii virgeomâháá šleđgâhámásii ášástâllâmpalvâlusân, te tun stivrejuuh väldiđ Suomi.fi-viestâid kiävtun. Puátteevuođâst tun finniih tohon poostâ maaŋgâin virgeomâháin. Suomi.fi-viestah šadda virgeomâháin puáttee pááppárpoostâ sajan: siämmáš äšši ij puáđi innig maŋeláá reivân pááikán.
Suomi.fi-viestâi kiävtun väldim tábáhtuvá virgeomâhái palvâlussáid tubdâttâttâm ohtâvuođâst. Kiävtun väldim váátá jieijâs tooimâid, já tot ij tábáhtuu huámmášhánnáá. Jo tääl paijeel 2,6 miljovn olmožid váldá virgeomâhâšpoostâ vuástá Suomi.fi-viestáid. Puátteevuođâst lii vyerdimnáál, et palvâlus kevtteemeeri lassaan merhâšitteht, tondiet ko paijeel nelji miljovn olmožid ášásteleh virgeomâháiguin šleđgâhámásávt jo tääl.
Maht já kiäs Suomi.fi-viestah šadda kiävtun?
– Suomi.fi-viestah šadda kiävtun, jis tun lah olesahasâš, tun kiävtáh virgeomâhái šleđgâhámásijd ášástâllâmpalvâlusâid já tust ij lah vala Suomi.fi-viestah kiävtust. Tun stivrejuuh väldiđ Suomi.fi-viestâid kiävtun, ko tubdâttâđah nanosávt monnii almos haldâttuv ášástâllâmpalvâlusân paŋkkitubdâlduvâiguin, moobilnanodâssáin tâi persovnkoortâ nanodâssáin, muštâl hahâhovdâ Annette Hotari Digi- já aalmugtiätuvirgáduvâst.
Kiävtun väldim ohtâvuođâst kalga almottiđ jieijâs šleđgâpostâčujottâs já nanodiđ tom. Tánávt tun finniih šleđgâpoostân ain almottâs uđđâ viestâst. Šleđgâpostâčujottâs almottem maŋa tun juáđháh tubdâttâttâm táválávt já sirduuh ton ášástâllâmpalvâlusân, moos lijjih monâmin.
Nubástus ij kuoskâ toid, kiäh iä keevti virgeomâhái digipalvâlusâid
Jis tun jieh keevti almos haldâttuv šleđgâhámásijd ášástâllâmpalvâlusâid, te nubástus ij vaaigut tunjin, pic tun finniih puátteevuođâst-uv virgeomâhái vuolgâttem poostâ pááppárpostân.
Nubástus ij meidgin kuoskâ vyeliahasijd, hiäđukocceem vuálásijd ige taid ulmuid, kiäin lii vyeimist leijee hiäđukocceemvalduuttem.
Virgeomâhâšpoostâ puáhtá finniđ puátteevuođâst-uv pááppárpostân
Hotari muštâl, et virgeomâhái vuolgâttem reeivâid puáhtá finniđ puátteevuođâst-uv pááppárhäämist, veikkâ ášástâlâččij virgeomâháiguin digitallávt.
– Tun puávtáh molsođ reeivâi toimâttemvyehhin pááppárpoostâ, ko lah vistig váldám Suomi.fi-viestâid kiävtun. Molso toimâttemvyevi Suomi.fi-viestâi asâttâsâin.
Valjim pááppárpoostâ vuástáväldimist piso vyeimist ucemustáá ive. Ko ive maŋa tun tubdâttâđah čuávuváá tove monnii virgeomâháá ášástâllâmpalvâlusân, te tun stivrejuuh oppeet väldiđ Suomi.fi-viestâid kiävtun. Jis tun jieh tubdâttât, te virgeomâhâšpostâ puátá tunjin pááppárpostân meid ive meriääigi maŋa.
Moobilheiviittâs lii älkkeemus vyehi luuhâđ puáttám viestâid
Hotari muštoot, et Suomi.fi-moobilheiviittâs lii neppirumos vyehi luuhâđ virgeomâháin puáttám poostâ.
– Tun puávtáh luuhâđ virgeomâháin puáttám viestâid njuolgist Suomi.fi-heiviittâsâst. Heiviittâs meid almoot, ko tohon puátá uđđâ viestâ. Viestah pisoh tuu fáárust já láá älkkeht finnimnáál kost peri tun lah.
Lii tehálâš mušteđ sirduđ luuhâđ uđđâ viestâ ain jo-uv Suomi.fi-moobilheiviittâsâst tâi čáládâtmáin čujottâsâst suomi.fi/viestit.
– Kuássin ij koolgâ sirduđ luuhâđ viestâ šleđgâpostáin tâi tekstâviestân puáttám liiŋkâi peht. Suomi.fi-viestah ij vuolgât tekstâviestâid tâi Whatsapp-viestâid vuástáväldeid. Šleđgâpoostân puátá almottâs uđđâ viestâst, mut tast ij tiätutorvosuujâi keežild kuássin lah liŋkkâ, mii avžuuttuuččij celkkâliđ, iätá Hotari.
Lasetiäđuh
Digi- já aalmugtiätuvirgádâh, hahâhovdâ Annette Hotari, [email protected]
Návt tun peesah luuhâđ Suomi.fi-viestáid puáttám viestâid
- Tun puávtáh luuhâđ viestâid Suomi.fi-moobilheiviittâssáin tâi tubdâttâtmáin Suomi.fi-viermipalvâlusân já sirduumáin tobbeen sajan "Viestit" (Viestah).
- Tubdâttâttâm tábáhtuvá paŋkkitubdâlduvâiguin, moobilnanodâssáin tâi persovnkoortâ šleđgâhámásijn nanodâssáin.
- Tun finniih almottâs jieijâd šleđgâpoostân ain, ko tunjin puátá Suomi.fi-viestáid uđđâ viestâ.
- Tun finniih almottâsâid puáttám viestâin meid Suomi.fi-moobilheiviittâsâst, jis tun lah luođim heiviittâs kiävtun.
Tooimâ návt, jis halijdah maccâđ pááppárpoostâ vuástávälden:
- Vääldi Suomi.fi-viestâid kiävtun, ko tubdâttâđah virgeomâháá viermipalvâlusân. Tun puávtáh maccâđ pááppárpoostâ vuástávälden eskin ton maŋa.
- Sirduu Suomi.fi-viestáid čujottâsâst suomi.fi/viestit.
- Tubdâttât palvâlusân paŋkkitubdâlduvâiguin, moobilnanodâssáin tâi persovnkoortâ nanodâssáin.
- Sirduu valjiittuvâst sajan "Asetukset" (Asâttâsah) já "Lopeta Suomi.fi-viestien käyttö" (Jooskâ Suomi.fi-viestâi kevttim).
Táárbu mield tun finniih iše meid Suomi.fi-palvâlusâi ravvimpalvâlusâst (p. 0295 000).
Jis tuu kiävtust lii Suomi.fi-moobilheiviittâs, te huámmáš, et
- tuše heiviittâs meddâlistem ij meddâlist Suomi.fi-viestâid tuu kiävtust
- palvâlus kiävtust meddâlistem kalga ain porgâđ Suomi.fi-viestâi asâttâsâin.
Návt tun kiävtáh Suomi.fi-viestâid torvolávt
- Sirduu ain luuhâđ uđđâ viestâ jo-uv Suomi.fi-moobilheiviittâsâst tâi čáládâtmáin čujottâsâst suomi.fi/viestit. Ele celkkâl šleđgâpoostâst tâi tekstâviestâst puáttám liiŋkâid.
- Suomi.fi-viestâi šleđgâpostâalmottâsâin iä lah liiŋkah. Suomi.fi ij vuolgât tekstâviestâid, WhatsApp-viestâid tâi eres huáppuviestâid. Šleđgâpostâalmottâsah Suomi.fi:n puáttám viestâin puátih [email protected]čujottâsâst.
- Virgeomâhâš ij paanâšt toimâđ huáppoin. Virgeomâhááh iä kuássin uálgut toommâđ jotelávt, luovâttiđ tiäđuid tâi celkkâliđ liiŋkâid tedduu vyelni.
- Jis epidah fillim, te puávtáh visásmittiđ viestâ tuotâvuođâ čáládâtmáin Suomi.fi-viestáid čujottâsâst suomi.fi/viestit tâi lekkâmáin Suomi.fi-heiviittâs.
- Čääli čujottâs jieš laađân čujottâskiädán. Ele sirduu palvâlusân uuccâmmaašin puátusij peht.
Návt tun stivrejuuh väldiđ Suomi.fi-viestâid kiävtun, ko tubdâttâđah almos haldâttuv šleđgâhámásijd palvâlussáid:
Lasetiätuliiŋkah
- Lasetiäđuh Suomi.fi-viestâin
- Ravâvideo: Návt tun vááldáh Suomi.fi-viestâid kiävtun tubdâttâttâm ohtâvuođâst
- Lasetiäđuh Suomi.fi-tubdâmist
- Suomi.fi-viestáid poostâ vuolgâtteijee organisaatioh
- Návt mun meddâlistám Suomi.fi-viestâid kiävtust
Mii lii Suomi.fi-viestah?
Suomi.fi-viestah lii tiätutorvolâš šleđgâhámásâš postâloová, mii šadda pááppárpostân puáttee virgeomâhâšpoostâ sajan. Palvâlus kevttih maaŋgah virgeomâhááh, já meeri lassaan ovttuu. Puáttám viestâid puáhtá luuhâđ Suomi.fi-moobilheiviittâssáin tâi tubdâttâtmáin Suomi.fi-viermipalvâlusân čujottâsâst suomi.fi. Tánávt puáttám postâ lii luuhâmnáál jyehi saajeest, kost peri tun jođáh.
Suomi.fi-viestâid finnee kiävtun luođiimáin Suomi.fi-moobilheiviittâs tâi tubdâttâtmáin čujottâsâst suomi.fi/viestit. Tubdâttâttâm tábáhtuvá paŋkkitubdâlduvâiguin, moobilnanodâssáin tâi persovnkoortâ šleđgâhámásijn nanodâssáin. Väldimáin Suomi.fi-viestâid kiävtun finnee puátteevuođâst meid maaŋgâi jieškote-uv virgeomâhái vuolgâttem poostâ šleđgâhäämist.
Almottâsah uđđâ puáttám viestâin puátih ton šleđgâpostâčujottâsân, mon kevttee lii almottâm palvâlusân. Suomi.fi-moobilheiviittâs kevtteeh finnejeh almottâs meid njuolgist heiviittâs peht.
Njuhčâmáánust 2026 Suomi.fi-viestâid kevttii jo paijeel 2,6 miljovn olmožid.
Lasetiäđuh Suomi.fi-viestâin: suomi.fi/fi/viestah
Maid uáivild digitallii virgeomâhâšviestâdmân sirdum?
Virgeomâhâšpoostâ digitallii vuosâsajasâšvuotân kyeskee lahâasâttem šadda vuáimán 14.4.2026. Tast maŋa virgeomâhâšpostâ toimâttuvvoo vuosâsajasávt digitallávt puohháid, kiäh ášásteleh šleđgâhámásávt. Virgeomâhái šleđgâhámásijd ášástâllâmpalvâlussáid čáládettee olesahasiih ulmuuh stivrejuvvojeh tubdâttâttâm ohtâvuođâst väldiđ Suomi.fi-viestâid kiävtun, jis palvâlus ij lah jo ovdiist kiävtust.
Toh, kiäh iä keevti virgeomâhái digipalvâlusâid, finnejeh puátteevuođâst-uv virgeomâhâšpoostâ pááppárhäämist, peic jis jiejah väljejeh eresnáál. Šleđgâhámásij viestâi vuástáväldim puáhtá meid koskâldittiđ, já talle viestah vuolgâttuvvojeh oppeet pááppárpostân. Jis olmooš, kote lii valjim pááppárpoostâ, juátká šleđgâhámásii ášástâllâm, te sun stivrejuvvoo 365 peeivi maŋa uđđâsist väldiđ Suomi.fi-viestâid kiävtun, ko sun čuávuváá tove tubdâttât monnii virgeomâháá šleđgâhámásii ášástâllâmpalvâlusân.
Sirdum digitallii viestâdmân puáhtá merhâšittee hiäđuid. Tot šiäštá ohtsâškode ruuđâid luuvijd miljovnijd euroid ivveest já taha aalmugjesânij eellim älkkeebin. Virgeomâhái vuolgâttem reeivah láá jotelávt finnimnáál, kávnojeh oovtâ saajeest já láá ain kevttimnáál.
Ko lahâasâttem lii šoddâm vuáimán, te virgeomâhâšpostâ toimâttuvvoo vuosâsajasávt Suomi.fi-viestáid puohháid, kiäh ášásteleh šleđgâhámásávt. Suomi.fi-viestâi lasseen aalmugjesânáid puáhtá ain-uv puáttiđ postâ virgeomâháin meid eres digitallijd oolijd, jis olmooš lii váldám taid kiävtun.
Maŋeláá ive 2026 ääigi lii ulmen, et olmooš puávtáččij valjiđ virgeomâhâšpoostâ vuástáväldimsaijeen Suomi.fi lasseen meid monnii eres digipostâpalvâlus, mii tiävdá virgeomâháá viestâjoođeetmân asâttum tiätutorvo- já eres vátámušâid. Valjimrijjâvuođâ vaattâm lahâasâttemnubástusah já teknisiih nubástusah láá eidu tääl valmâštâllâmnáál.
Luuvâ lase: dvv.fi/digi-ensin-hanke
