Veʹrǧǧneǩpååʹšt seʹrdde digitaalʼlõʹžžen– Suomi.fi-saaǥǥ koʹrvvee tääuʹjbid veʹrǧǧniiʹǩǩi vuõltteem põʹmmaiǩeeʹrjid
Veʹrǧǧneǩpååʹšt vuâsttavälddmõš mottai digitaalʼlõʹžžen. Tâʹl ǥu tobddõõđak 14.4.2026 leʹbe tõʹst õõudâs puõʹtti vuâra koon-ne veʹrǧǧneeʹǩǩ liâđǥlaž äʹššõõttâmkääzzkõʹsse, tuu ohjjee väʹldded Suomi.fi-saaǥǥid ââʹnnemnalla. Juätkast vuäǯǯak tõk pååʹšt tääuʹjbin veʹrǧǧniiʹǩǩin. Suomi.fi-saaǥǥ koʹrvvee veʹrǧǧniiʹǩǩin puõʹtti põʹmmaipååʹšt: seämma ääʹšš jiâ vuõlttâd teänab mâʹŋŋlubust ǩeʹrjjen dooma.
Suomi.fi-saaǥǥi ââʹnnemvälddmõš puätt veʹrǧǧneeʹǩǩ kääzzkõõzzi tobddõõttâm õhttvuõđâst. Ââʹnnemvälddmõš õõlǥat jiijjad tååimaid ij-ga tõt puäʹđ vuâmmšeǩâni. Ååʹn juʹn pâʹjjel 2.6 miljoon oummu vuâsttaväʹldde veʹrǧǧneǩpååʹšt Suomi.fi-saaǥǥid. Juätkast lij vueʹrddemnalla, što kääzzkõõzz õõʹnnʼji mieʹrr šâdd veâllan, ǥu pâʹjjel nellj miljoon oummu ääʹššâʹtte veʹrǧǧniiʹǩǩivuiʹm liâđǥlõʹžžen juʹn ååʹn.
Mäʹhtt da ǩeäzz Suomi.fi-saaǥǥ puäʹtte ââʹnnemnalla?
–Suomi.fi-saaǥǥ puäʹtte ââʹnnemnalla, jõs leäk tiuddâkksaž, âânak veʹrǧǧniiʹǩǩi liâđǥlaž äʹššõõttâmkääzzkõõzzid da tuʹst jiâ leäkku veâl Suomi.fi-saaǥǥ âânnmõõžžâst. Tuu ohjjee väʹldded Suomi.fi ââʹnnemnalla, ǥu tobddõõđak ravvsânji koon-ne õõlmâs vaaldâšm äʹššõõttâmkääzzkõʹsse baŋkktobdldõõǥǥin leʹbe personkoortâst åårrai ravvõõzzin, ceälkk haʹŋǩǩõs-šurr Annette Hotari Digi- da narodteâttkonttrest.
Ââʹnnemvälddmõõžž õhttvuõđâst âlgg iʹlmmted neʹttpååʹštaddrõs da raʹvvjed tõt. Nääiʹt vuäǯǯak neʹttpååšta pâi iʹlmmtõõzz ođđ saaǥǥâst. Neʹttpååʹštaddrõs iʹlmmtõõzz mâŋŋa juätkak tobddõõttmõõžž takainalla da siirdčõõđak äʹššõõttâmkääzzkõʹsse, koozz leʹjjiǩ mõõnnmen.
Muuttâs ij kuõsk tõid, kook jiâ ââʹn veʹrǧǧniiʹǩǩi digikääzzkõõzzid
Jõs jiõk ââʹn õõlmâs vaaldâšm liâđǥlaž äʹššõõttâmkääzzkõõzzid, muuttâs ij vaikkat tuʹnne, ba vuäǯǯak še juätkast veʹrǧǧneeʹǩǩ vuõltteem pååʹšt põʹmmaipååʹšten.
Muuttâs ij še kuõsk vueʹllâkksaid, ouddõsvalvvmõõžžâst åårrjid ij-ga tõid oummid, koin lij viõǥǥâst åårrai ouddõsǩiõččâmvälddõs.
Veʹrǧǧneǩpååʹšt vuäitt vuäǯǯad še juätkast põʹmmaipååʹšten
Hotari ceälkk, što veʹrǧǧneeʹǩǩ vuõltteem ǩeeʹrjid vuäitt vuäǯǯad še juätkast põʹmmaipååʹšten, håt-i ääʹššõõđči veʹrǧǧniiʹǩǩivuiʹm digitaalʼlõʹžžen.
Vuäitak vaajted ǩeeʹrji tååimtemnääʹllen põʹmmaipååʹšt, ǥu leäk vueʹššen välddam Suomi.fi-saaǥǥid ââʹnnemnalla. Vaajat tååimtemnääʹl Suomi.fi-saaǥǥi šiõttõõzzin.
Vâʹlljõs põʹmmaipååʹšt vuâsttavälddmõõžžâst pââšš viõǥǥâst uuʹccmõssân pirreeʹjj. Ǥu pirreeʹjj mâŋŋa tobddõõđak puõʹtti vuâra koon-ne veʹrǧǧneeʹǩǩ äʹššõõttâmkääzzkõʹsse, tuu ohjjee väʹldded Suomi.fi-saaǥǥid ââʹnnemnalla. Jõs jiõk tobddõõđ, veʹrǧǧneǩpååʹšt puätt tuʹnne põʹmmaipååʹšten še eeʹjj mieʹrrääiʹj mâŋŋa.
Mobiilsuåvldõs lij hiâlpmõs nääʹll lookkâd puättam saaǥǥid
Hotari mošttad, što Suomi.fi-mobiilsuåvldõs lij hiâlpmõs nääʹll lookkâd veʹrǧǧniiʹǩǩin puättam pååʹšt.
–Vuäitak lookkâd veʹrǧǧniiʹǩǩin puättam saaǥǥid vuõiʹǧǧest Suomi.fi-suåvldõõzzâst. Suåvldõs še iʹlmmat, ǥu tõk puätt ođđ saakk. Saaǥǥ pâʹšše mieʹldd da liâ hiâlpeld vuäǯǯamnalla koʹst täättas leʹččiǩ.
Lij vääžnai muʹštted siirdčõõttâd lookkâd ođđ saaǥǥ pâi Suomi.fi-mobiilsuåvldõõzzâst leʹbe ǩeʹrjjõõđeeʹl addrõõzzâst suomi.fi/saaǥǥ.
–Ij ni kuäʹss õõlǥ siirdčõõttâd lookkâd saaǥǥ neʹttpååʹštest leʹbe teʹksttsaaǥǥin puättam liiŋk pääiʹǩ. Suomi.fi-saaǥǥ jiâ vuõlttâd teʹksttsaaǥǥid leʹbe whatsapp-saaǥǥid vuâsttavalddja. Nettpååšta puäʹtte iʹlmmtõõzz ođđ saaǥǥin, leša tõʹst jeäʹla teâttstaanmääiʹnest ni kuäʹss liiŋk, koon õõlǥči cuåkkled, ceälkk Hotari.
Lââʹssteâđ
Digi- da narodteâttkoontâr, haʹŋǩǩõs-šurr Annette Hotari, [email protected]
Nääiʹt piâzzak lookkâd Suomi.fi-saaǥǥid puättam saaǥǥid
- Vuäitak lookkâd saaǥǥid Suomi.fi-mobiilsuåvldõõzzin leʹbe tobddõõđeeʹl Suomi.fi-verkkopalveluun da siirdčõõđeeʹl toʹben päikka “Saaǥǥ”
- Tobddõõttmõš âlgg raajjâd baŋkktobdldõõǥǥin, mobiilravvõõzzin leʹbe personkoort liâđǥlaž ravvõõzzin.
- Vuäǯǯak iʹlmmtõõzz neʹttpååšta pâi, ǥu tuʹnne lij puättam Suomi.fi-saaǥǥid ođđ saakk.
- Vuäǯǯak iʹlmmtõõzz puättam saaǥǥin še Suomi.fi-mobiilsuåvldõõzzâst, jõs leäk leämnnam suåvldõõzz ââʹnnemnalla.
Toiʹmme nääiʹt, jõs haaʹlääk mäʹcced põʹmmaipååʹšt vuâsttavalddjen:
- Vääʹld Suomi.fi-saaǥǥid ââʹnnemnalla, ǥu tobddõõđak veʹrǧǧneeʹǩǩ neʹttkääzzkõʹsse. Vuäitak mäʹcced põʹmmaipååʹšt vuâsttavalddjen eman tän mâŋŋa.
- Siirdčõõđ Suomi.fi-saaǥǥid addrõõzzâst suomi.fi/viestit.
- Tobddõõđ kääzzkõʹsse baŋkktobdldõõǥǥin, mobiilravvõõzzin personkoort ravvõõzzin.
- Siirdčõõđ vâʹlljõõzzâst päikka ”Šiõttõõzz” da vâʹlljed "Looppâd Suomi.fi-saaǥǥi âânnmõš".
Taarbšeʹmmen vuäǯǯak vieʹǩǩ še Suomi.fi-kääzzkõõzzi vuäʹpstempääiʹǩest (teʹl. 0295 000).
Jõs âânnmõõžžâst lij Suomi.fi-mobiilsuåvldõs, vuâmmaš, što
- tåʹlǩǩ suåvldõõzz jaukkummuš ij jaukkad Suomi.fi-saaǥǥid âânnmõõžžâst
- kääzzkõõzz jaukkummuš âlgg pâi tuejjeed Suomi.fi-saaǥǥi šiõttõõzzin
Nääiʹt âânak Suomi.fi-saaǥǥid staanjõssân
- Siirdčõõđ lookkâd ođđ saaǥǥ pâi Suomi.fi-mobiilsuåvldõõzzâst leʹbe ǩeʹrjjõõđeeʹl addrõõzzâst suomi.fi/saaǥǥ. Jeäʹl cuåkkal neʹttpååʹštest leʹbe teʹksttsaaǥǥan puättam liiŋkid.
- Suomi.fi-saaǥǥi neʹttpååʹšt-iʹlmmtõõzzin jiâ leäkku liiŋk. Suomi.fi ij vuõlttâd teʹksttsaaǥǥid, WhatsApp-saaǥǥid leʹbe jeeʹres ǩiʹrǧǧes-saaǥǥid. Neʹttpååʹšt iʹlmmtõõzz Suomi.fi-saaǥǥid puäʹtte [email protected]õõzzâst.
- Veʹrǧǧneǩ ij pääkkad ǩiirted. Veʹrǧǧneeʹǩǩ jiâ ni kuäʹss õõlǥat tåimmad ǩirrsest, luõvted teâđaid leʹbe cuåkkled liiŋkid teäddõõzz vueʹlnn..
- Jõs joordak maannmõõžž, vuäitak ainsmâʹtted saaǥǥi alggveärlažvuõđ Suomi.fi-saaǥǥi addrõõzzâst suomi.fi/viestit leʹbe ääʹveel Suomi.fi-suåvldõõzz.
- Ǩeeʹrjet addrõs jiõčč neʹttlookki addrõsčokka. Jeäʹl mõõn kääzzkõʹsse ooccâm-mašina puåđõõzzi pääiʹǩ.
Nääiʹt tuu ohjjee väʹldded Suomi.fi-saaǥǥid ââʹnnemnalla, ǥu tobddõõđak õõlmâs vaaldâšm liâđǥlaž kääzzkõõzzid:
Lââʹssteâttliiŋk
- Lââʹssteâđ Suomi.fi-saaǥǥin
- Vuäʹpstemvideo: Nääiʹt vääldak Suomi.fi-saaǥǥid ââʹnnemnalla tobddõõttâm õhttvuõđâst
- Lââʹssteâđ Suomi.fi-tobddõõttmõõžžâst
- Suomi.fi-saaǥǥid pååʹšt vuõltteei organisaatia
- Nääiʹt jaukkääm Suomi.fi-saaǥǥid âânnmõõžžâst
Mõõk liâ Suomi.fi-saaǥǥ?
Suomi.fi-saaǥǥ lij teâttstaanai liâđǥlaž pååʹštčuʹǩǩ, kååʹtt koʹrvvad põʹmmaipååʹšten puõʹtti veʹrǧǧneǩpååʹšt. Kääzzkõõzz âʹnne määŋg veʹrǧǧneeʹǩǩ da mieʹrr šâdd juätkkjeeʹjen. Puättam saaǥǥid vuäitt lookkâd Suomi.fi-mobiilsuåvldõõzzin leʹbe tobddõõđeeʹl Suomi.fi-neʹttkääzzkõʹsse addrõõzzâst suomi.fi. Nääiʹt puättam pååʹšt lij lookkâmnalla juõʹǩǩ sââʹjest, koʹst jååđak.
Suomi.fi-saaǥǥid vuäǯǯak ââʹnnemnalla leäʹmnneeʹl Suomi.fi-mobiilsuåvldõõzz leʹbe tobddõõđeeʹl addrõõzzâst suomi.fi/viestit. Tobddõõttâd âlgg baŋkktobdldõõǥǥin, mobiilravvõõzzin leʹbe personkoort liâđǥlaž ravvõõzzin, tâʹl ǥu vääldak Suomi.fi-saaǥǥid ââʹnnemnalla, vuäǯǯak juätkast še määŋgai jeeʹres veʹrǧǧniiʹǩǩi vuõltteem pååʹšt liâđǥlõʹžžen.
Iʹlmmtõõzz ođđ puättam saaǥǥin puäʹtte neʹttpååʹštaddrõʹsse, koon leäk iʹlmmtam kääzzkõʹsse. Suomi.fi-mobiilsuåvldõõzz õõʹnni vuäǯǯa iʹlmmtõõzz še vuõiʹǧǧest suåvldõõzz pääiʹǩ.
Pâʹsslašttâm-mannust 2026 Suomi.fi-saaǥǥid õʹnne juʹn pâiʹl 2.6 miljoon oummu.
Lââʹssteâđ Suomi.fi -saaǥǥin: suomi.fi/fi/saagg
Mâʹst siirdčõõttmõõžžâst digitaalʼlõʹžže veʹrǧǧneǩsaakkummša lij kõõččmõš?
Veʹrǧǧneǩpååʹšt digitaalʼlaž vuõss-sâjjsažvuõđ kuõskki lääʹjjšiõttummuš puätt viõʹǩǩe 14.4.2026. Tän mâŋŋa veʹrǧǧneǩpååʹšt tååimte vuõss-sââʹjest digitaalʼlõʹžžen pukid, kook ääʹššâʹtte liâđǥlõʹžžen. Veʹrǧǧneeʹǩǩ liâđǥlaž äʹššõõttâmkääzzkõõzzid ǩeʹrjjõõtti tiuddâkksaž oummid ohjjee tobddõõttâm õhttvuõđâst väʹldded Suomi.fi-saaǥǥid ââʹnnemnalla, jõs kääzzkõs ij leäkku juʹn ouddlest ââʹnnemnalla.
Tõk, ǩeäk jiâ ââʹn veʹrǧǧniiʹǩǩi digikääzzkõõzzid, vuäǯǯa juätkast še veʹrǧǧneǩpååʹšt põʹmmaipååʹšten, jõs jiâ jiõjj vaʹlljed nuuʹbbnalla. Liâđǥlaž saaǥǥi vuâsttavälddmõõžž vuäitt še kõõskâʹtted, tâʹl saaǥǥid vuõlttee eʹpet põʹmmaipååʹšten. Jõs ooumaž, kååʹtt lij vaʹlljääm põʹmmaipååʹšt, juätkk liâđǥlaž äʹššõõttmõõžž, suu ohjjee 365 peeiʹv mâŋŋa oʹđđest väʹldded ââʹnnemnalla Suomi.fi-saaǥǥid, ǥu son puõʹtti vuâra tobddââtt koon-ne veʹrǧǧneeʹǩǩ liâđǥlõʹžže äʹššõõttâmkääzzkõʹsse.
Siirdčõõttmõš digitaalʼlõʹžže pååšta pohtt miârkkteeʹjid ääuʹǩid.Tõt šeäštt õhttsažkååʹdd vaaʹrid looʹji miljoon eeuʹrid pirreeʹjjest da hiâlpad meerlai aarǥ. Veʹrǧǧniiʹǩǩi vuõltteem ǩeeʹrj liâ jåttlânji vuäǯǯamnalla, käunnʼje õhttân pääiʹǩest da liâ pâi ââʹnnemnalla.
Lääʹjjšiõttõõzz pueʹttmen viõʹǩǩe veʹrǧǧneǩpååʹšt tååimte vuõss-sââʹjest Suomi.fi-saaǥǥid pukid, ǩeäk ääʹššâʹtte liâđǥlânji. Suomi.fi-saaǥǥi lââʹssen meerlaid vueiʹtte ooudâs pueʹtted veʹrǧǧniiʹǩǩin pååʹšt še jeeʹres digitaalʼlõʹžže vuõllsid, jõs ooumaž lij välddam tõid ââʹnnemnalla.
Mâʹŋŋlubust eeʹjj 2026 poddân lij õõlǥtõs, što ooumaž vuäitči vaʹlljeed veʹrǧǧneǩpååʹšt vuâsttaväʹlddempäiʹǩǩen Suomi.fi lââʹzzen še mõõn-ne jeeʹres digipååʹštkääzzkõõzz, kååʹtt teudd veʹrǧǧneeʹǩǩ saakkvääʹltummša šiõttuum teâttstaan- da jeeʹres õõlǥtõõzzid. Vaʹlljeempååđvuõđ oudldem lääʹjjšiõtteem-muttsid da teeknlaž muttsid liâ juʹn valmštõõllmen.
Looǥǥ lââʹss: dvv.fi/digi-ensin-hanke
