Láhkanuppástus dagai digipoasttas navdosa – Suomi.fi-die’uid geavaheaddjimearri njuikii seammás 3,5 miljovdnii

Suomi.fi-dieđuid geavaheaddjimearri lea lassánan guovtti vahkus badjel 800 000 geavaheaddjiin. Dál Suomi.fi-dieđut leat anus jo 3,5 miljon olbmos. Dát boahtá cuoŋománu beallemuttus fápmui boahtán láhkanuppástusas. Dan mielde virgeoapmahaččaid digibálvalusaid geavaheaddjit leat oahpistuvvon váldit atnui Suomi.fi-dieđuid, go sii duođaštit identitehtas muhtun virgeoapmahačča elektrovnnalaš áššiiddikšunbálvalusas.

– Suomi.fi-dieđuid geavaheaddjimearri lea lassánan garrasit buot ahkejoavkkuin. Lassánanvárri lea goittotge ain, go badjel njeallje miljon olbmo geavahit virgeoapmahaččaid áššiiddikšunbálvalusaid ainjuo oktii jagis. Jus sii eai leat vel váldán Suomi.fi-dieđuid atnui, sii oahpistuvvojit váldit bálvalusa atnui, go sii čuovvovaš háve duođaštit identitehtaset muhtun virgeoapmahačča elektrovnnalaš áššiiddikšunbálvalusas, dadje fidnooaivámuš Annette Hotari Digi- ja álbmotdiehtodoaimmahagas.

Suomi.fi-dieđuid atnuiváldima lea jođálmahttán cuoŋománus ee. vearroevttohusaid dárkkisteami mearreáiggit, go dalle stuorra oassi suopmelaččain dikšot áššiideaset Vearrohálddahusa áššiiddikšunbálvalusas. Oassái čuovvovaš áššiiddikšundáhpáhus muhtun virgeoapmahaččain sáhttá goittotge leat áigeguovdil easkka maŋŋeleappos dán jagi.

Báberpostii sáhttá álo máhccat ruovttoluotta 

Virgeoapmahašpoastta rievdan digitálan boktá olu jearaldagaid. Digi- ja álbmotdiehtodoaimmahat veahkeha riikkavuložiid Suomi.fi-dieđuid geavaheapmái gullevaš jearaldagain sihke telefovnnas (t. 0295 000) ja iežas bálvalanbáikkiidisguin.

– Lága fápmuiboahtima maŋŋá oktavuođaváldimiid mearri min áššehasbálvalusas leamašan njealjegeardásaš ovddit mánuid ektui. Leat dikšon oktavuođaváldimiid bures ja áššehasaide leat bastán vástidit johtilit. Dábálepmosat jearaldagat leat laktásan Suomi.fi-dieđuid atnui váldimii ja vejolašvuhtii máhccat báberpoastta vuostáiváldin, muitala Hotari.

Hotari muittuha, ahte Suomi.fi-dieđut eai boađe atnui daidda, geat eai divššo áššiideaset virgeoapmahačča áššiiddikšunbálvalusas. Sii ožžot virgeoapmahaččaid reivviid boahttevuođasge báberpoastan. Áššis ii dárbbaš almmuhit Digi- ja álbmotdiehtodoaimmahahkii. Báberpostii sáhttá maiddái álo máhccat ruovttoluotta.

– Virgeoapmahaččaid sádden reivviid sáhttá dás duohkoge oažžut báberhámis, vaikke divššošiige áššiid virgeoapmahaččain digitálalaččat. Sáhtát molsut Suomi.fi-dieđuid stellemiin reivviid doaimmahanvuohkin báberpoastta, go leat vuos váldán Suomi.fi-dieđuid atnui, rávve Hotari.

Lága fápmuiboahtima maŋŋá Suomi.fi-dieđuid atnui váldán olbmuin dušše 8 % leat máhccan váldit virgeoapmahašpoastta vuostá báberpoastan. Suomi.fi-dieđuid leahkima áigge, juovlamánu 2017 maŋŋá, oktiibuot dušše 2 % buot Suomi.fi-dieđuid atnui váldán olbmuin leat máhccan báberpoastta vuostáiváldin.

Maiddái dájuheaddjit figget ávkkástallat nuppástusa 

​​​​​​​Suomi.fi-dieđuid namain leamašan jeavddalaččat dájuhandieđut, maiguin figgat oččodit báŋkodovddaldagaid. Dávisteaddji dájuheamit dihttojit máŋggaid earáidge virgeoapmahaččaid ja priváhta doaibmiid, dego báŋkkuid, dáhkádusfitnodagaid ja operáhtoriid, namain. Digi- ja álbmotdiehtodoaimmahaga dieđuid mielde Suomi.fi namain boahtán dájuhandieđuid mearis eai leat dáhpáhuvvan mearkkašahtti nuppástusat lága fápmuiboahtima maŋŋá.

– Seammá sullasaš dájuhandieđut leat leamašan máŋgga jagi áigge, muhto dál go Suomi.fi-dieđut lea eandalii áigeguovdilis bálvalus, de dáidda dájuhemiide giddejuvvo eanet fuomášupmi go árabut. Váidalahtti rihkolaččat figget álo ávkkástallat dakkár fáttás, mii lea dan dilis muđuige áigeguovdilis, muitala Hotari.

Dorvvolaš geavaheami rávvagat leat seammát digibálvalusas beroškeahttá: ále goassige spoahkkal šleađgapoastta dahje teakstadieđu bokte boahtán liŋkkaid, muhto sirdás gažaldatvuloš bálvalussii nu, ahte čálát álo ieš čujuhusa čujuhusgieddái. Eanemus ávžžuhahtti vuohki lea geavahit mobiilaheivehusa álo, go dakkár lea oažžumis. Dalle ii feille čujuhusas ovdamearkan čállinmeattáhusa dihtii.

Hotari ávžžuhage virgeoapmahašpoastta lohkamii Suomi.fi-mobiilaheivehusa.

– Suomi.fi-mobiilaheivehus lea vuogálaš vuohki lohkat virgeoapmahaččain boahtán poastta. Sirdás lohkat ođđa dieđu álo juogo Suomi.fi-mobiilaheivehusain dahje čálihemiin sisa čujuhusas suomi.fi/viestit. Goassige ii galgga sirdásit lohkat dieđu šleađgapoasttain dahje teakstadieđuin boahtán liŋkkaid bokte. Suomi.fi-dieđut ii sádde teakstadieđuid dahje WhatsApp-dieđuid. Šleađgapostii boahtá almmuhus ođđa dieđus, muhto das ii diehtodorvosivaid geažil leat goassige liŋka, mii ávžžuhuvvo spoahkkaluvvot, dadjá Hotari.

Lassedieđut

Digi- ja álbmotdiehtodoaimmahat, fidnooaivámuš Annette Hotari, [email protected]