Lahânubástus keežild digipostâ vuosâsajasâš – Suomi.fi-viestâi kevtteemeeri lasanij häppilávt 3,5 miljovnân

Suomi.fi-viestâi kevtteemeeri lii lasanâm kyevti ohhoost paijeel 800 000 kevttein. Eidu tääl Suomi.fi-viestah lii aanoost jo paijeel 3,5 miljovn ulmust. Suijâ toos lii cuáŋuimáánu pelimuddoost vuáimán šoddâm lahânubástus. Ton ooleest virgeomâhái digipalvâlusâi kevtteeh láá stivrejum väldiđ Suomi.fi-viestâid anon, ko sij tubdâtteteh monnii virgeomâháá šleđgâhámásii ášástâllâmpalvâlusân.

– Suomi.fi-viestâi kevtteemeeri lii lasanâm čuuvtij puoh ahejuávhuin. Šoddâmvääri lii liijká ain-uv tondiet ko paijeel nelji miljovn olmožid kevttih virgeomâhái šleđgâhámásijd ášástâllâmpalvâlusâid aainâs-uv ohtii ivveest. Jis sij iä vala lah váldám Suomi.fi-viestâid anon, te sij stivrejuvvojeh väldiđ palvâlus anon, ko sij čuávuváá tove tubdâtteteh monnii virgeomâháá šleđgâhámásii ášástâllâmpalvâlusân, iätá hahâhovdâ Annette Hotari Digi- já aalmugtiätuvirgáduvâst.

Suomi.fi-viestâi anon väldimân láá adelâm liävtu cuáŋuimáánust il. viäruiävtuttâsâi tärhistem meriääigih, tondiet ko talle stuorrâ uási syemmilijn ášásteleh Viäruhaldâttuv šleđgâhámásii ášástâllâmpalvâlusâst. Uásán čuávuvâš ášástâllâmtohe moinnii virgeomâháin sáttá kuittâg leđe äigikyevdil eskin maŋeláá taan ive.

Pááppárpoostân puáhtá ain maccâđ

Virgeomâhâšpoostâ muttum digitallâžžân paajeed ennuv koččâmušâid. Digi- já aalmugtiätuvirgádâh iššeed aalmugjesânijd Suomi.fi-viestâi anon lohtâseijee koččâmušâin sehe puhelimáin (p. 0295 000) já meid jieijâs palvâlemsoojijn.

– Laavâ vuáimán šoddâm maŋa ohtâvuođâ väldimij meeri mii äššigâspalvâlusâst lii lamaš neeljikiärdásâš ko verdid oovdeb mánuppoojijd. Mij lep tipšom ohtâvuođâ väldimijd pyereest já lep pastam västidiđ äššigâssáid jotelávt. Tijpâlumoseh koččâmušah láá lohtâsâm Suomi.fi-viestâi anon väldimân já máhđulâšvuotân maccâđ pááppárpoostâ vuástávälden, muštâl Hotari.

Hotari muštoot, et Suomi.fi-viestah ij šoodâ anon toid, kiäh iä ášástâl virgeomâhái šleđgâhámásijn ášástâllâmpalvâlusâin. Sij finnejeh virgeomâhái reeivâid puátteevuođâst-uv pááppárpostân. Ääšist ij taarbâš almottiđ Digi- já aalmugtiätuvirgádâhân. Pááppárpoostân puáhtá meid ain maccâđ.

– Virgeomâhái vuolgâttem reeivâid puáhtá finniđ puátteevuođâst-uv pááppárhäämist, veikkâ ášástâlâččij-uv virgeomâháiguin digitallávt. Tun puávtáh molsođ Suomi.fi-viestâi asâttâsâin reeivâi toimâttemvyehhin pááppárpoostâ, ko lah vistig váldám Suomi.fi-viestâid anon, rävvee Hotari.

Laavâ vuáimán šoddâm maŋa Suomi.fi-viestâi anon váldám ulmuin tuše 8 % láá maccâm vuástáväldiđ virgeomâhâšpoostâs pááppárpostân. Ton ääigi, ko Suomi.fi-viestah lii lamaš almosijn, juovlâmáánu 2017 maŋa, ohtsis tuše 2 % puoh Suomi.fi-viestâid anon váldám ulmuin láá maccâm pááppárpoostâ vuástávälden.

Meid fillejeijeeh keččâleh hiettâđ nubástusâst

Suomi.fi-viestâi noomâst láá jottáám merikoskâsávt fillimviestah, moh keččâleh kuálástâllâđ paŋkkitubdâlduvâid. Siämmáálágán filliimeh láá joođoost maaŋgâi eres-uv virgeomâhái sehe priivaat tuáimei, tego paaŋkij, táhádâsfinnoduvâi já operaattorij, noomâst. Digi- já aalmugtiätuvirgáduv tiäđui mield Suomi.fi noomâst puáttee fillimviestâi meereest iä lah tábáhtum merhâšittee nubástusah laavâ vuáimán šoddâm maŋa.

– Siämmáálágán fillimviestah láá lamaš joođoost maaŋgâ ive ääigi, mut tääl ko Suomi.fi-viestah lii eromâš äigikyevdilis palvâlus, te ulmuuh tiäđust-uv kiddejeh taid filliimáid eenâb huámášume ko ovdeláá. Vaidâlitteht rikoliih viggeh ain hiettâđ taggaar fáádást, mii lii eidu talle mudoi-uv äigikyevdil, muštâl Hotari.

Torvolii kevttim ravvuuh láá siämmááh digipalvâlusâst sorjohánnáá: ele kuássin celkkâl šleđgâpoostâ tâi tekstâviestâ peht puáttám liiŋkâid, pic sirduu ton palvâlusân čälimáin palvâlus čujottâs ain jieš laađân čujottâsraddalâsân. Enâmustáá avžuuttum vyehi lii kevttiđ moobilheiviittâs ain, ko taggaar lii finnimnáál. Talle ij šoodâ puástu čujottâsân ovdâmerkkân čäällimfeeilâ tiet.

Hotari avžut-uv luuhâđ virgeomâhâšpoostâ Suomi.fi-moobilheiviittâssáin.

– Suomi.fi-moobilheiviittâs lii neppirumos vyehi luuhâđ virgeomâháin puáttám poostâ. Sirduu luuhâđ uđđâ viestâ ain jo-uv Suomi.fi-moobilheiviittâsâst tâi čáládâtmáin čujottâsâst suomi.fi/viestit. Kuássin ij koolgâ sirduđ luuhâđ viestâid šleđgâpoostâ tâi tekstâviestâ peht puáttám liiŋkâi peht. Suomi.fi-viestah ij kuássin vuolgât tekstâviestâid tâi WhatsApp-viestâid. Šleđgâpoostân puátá almottâs uđđâ viestâst, mut tast ij tiätutorvosuujâi keežild kuássin lah liŋkkâ, mon avžuuttiččii celkkâliđ, iätá Hotari.'

Lasetiäđuh

Digi- já aalmugtiätuvirgádâh, hahâhovdâ Annette Hotari, [email protected] 

Návt tun kiävtáh Suomi.fi-viestâid torvolávt

• Sirduu ain luuhâđ uđđâ viestâ jo-uv Suomi.fi-moobilheiviittâsâst tâi čáládâtmáin čujottâsâst suomi.fi/viestit. Ele celkkâl šleđgâpoostâ tâi tekstâviestâ peht puáttám liiŋkâid.
• Suomi.fi-viestâi šleđgâpostâalmottâsâin iä lah liiŋkah. Suomi.fi ij vuolgât tekstâviestâid, WhatsApp-viestâid tâi eres liähtuviestâid. Šleđgâpostâalmottâsah Suomi.fin puáttám viestâin puátih [email protected] -čujottâsâst.
• Virgeomâhááh iä kuássin vaađâ toimâđ huáppoin, luovâttiđ tiäđuid tâi celkkâliđ liiŋkâid tedduu vyelni.
• Jis tun epidah fillim, te puávtáh visásmittiđ viestâ rievtisvuođâ čáládâtmáin Suomi.fi-viestáid čujottâsâst suomi.fi/viestit tâi lekkâmáin Suomi.fi-heiviittâs. 
• Čääli čujottâs jieš laađân čujottâsraddalâsân. Ele sirduu palvâlusân uuccâmmaašin puátusij peht.