Lääʹǩǩmuuttâs tuejjii digipååʹštest aaibšõõzz – Suomi.fi-saaǥǥi õõʹnnʼjimieʹrr kaggõõđi juʹn 3,5 miljooʹne

Suomi.fi-saaǥǥi õõʹnnʼjimieʹrr lij kaggõõttâm kueʹhtten neäʹttlest pâiʹl 800 000 õõʹnnʼjin. Tän šiâtt Suomi.fi-saaǥǥ liâ âânnmõõžžâst juʹn 3.5 miljoonâst oummust. Tät vuâđđad njuhččmannu peäʹl rääʹjest viõʹǩǩe puättam lääʹǩǩmuttsest. Tõn mieʹtt veʹrǧǧniiʹǩǩi digikääzzkõõzzid liâ ohjjääm väʹldded Suomi.fi-saaǥǥid ââʹnnemnalla, tâʹl ǥu sij tobddâʹtte koon-ne veʹrǧǧneeʹǩǩ liâđǥlaž äʹššõõttâmkääzzkõʹsse.

– Suomi.fi-saaǥǥi õõʹnnʼjimieʹrr lij kaggõõttâm pukin ââʹǩǩäʹrttlin. Kaggâmväärr lij veâl, ǥu pâiʹl nellj miljoon oummu âʹnne veʹrǧǧneeʹǩǩ liâđǥlaž äʹššõõttâmkääzzkõõzzid kuuitâǥ õʹhttešt eeʹjjest. Jõs sij jiâ leäkku veâl välddam suomi.fi-saaǥǥid ââʹnnemnalla, siʹjjid ohjjee väʹldded kääzzkõõzz ââʹnnemnalla, ǥu sij puõʹtti vuâra tobddâʹtte koon-ne veʹrǧǧneeʹǩǩ liâđǥlaž äʹššõõttâmkääzzkõʹsse, ceälkk hankepäällikkö Annette Hotari Digi- da narodteâttkonttrest.

Suomi.fi-saaǥǥi ââʹnned välddmõõžžâst lij jåʹttlâttam njuhččmannust jm. piiđeʹtǩǩõõzzi taʹrǩstem mieʹrrääiʹj, ǥu tâʹl šuurmõs vueʹss lääʹddjânnamoummin ääʹššâʹtte Piiđvaaldâšm liâđǥlaž äʹššõõttâmkääzzkõõzzâst. Pieʹǩǩe puõʹtti äʹššõõttâmvuârr koon-ne veʹrǧǧneeʹǩǩin vââjj kuuitâǥ leeʹd ääiʹjpoddsaž eman mâʹŋŋlubust tän eeʹjj. 

Põʹmmaipååšta vuäitt pâi mäʹcced mååusat 

Veʹrǧǧneeʹǩǩpååʹšt mottjummuš digitaalʼlõʹžžen cåunn jiânnai kõõččmõõžžid. Digi- da narodteâttkoontâr veäʹǩǩat meerlaid Suomi.fi-saaǥǥi âânnmõʹšše kuulli kõõččmõõžžin teʹlfoonin (teʹl 0295 000) de jiijjâs kääzzkâʹsttempaaiʹǩin.

– Lääʹjj viõʹǩǩepueʹttem mâŋŋa õhttvuõttvälddmõõžži mieʹrr ääʹššlažkääzzkõõzzin lij leämmaš nelljǩeârddsaž ääiʹjbid määnpõõʹjid veʹrddeen. Leäʹp håiddam õhttvuõttvälddmõõžžid puârast da ääʹššlaid liâ pâsttam vaʹstteed jåttlânji. Takai kõõččmõõžž liâ kuullâm Suomi.fi-saaǥǥi ââʹnned välddmõʹšše da vueiʹtlvažvuõʹtte mäʹcced põʹmmaipååʹšt vuâsttavaʹlddjen, ceälkk Hotari.

Hotari mošttad, što Suomi.fi-saaǥǥ jiâ puäʹđ âânnmõʹšše tõid, ǩeäk jiâ ääʹššõõđ veʹrǧǧniiʹǩǩi liâđǥlain äʹššõõttâmkääzzkõõzzin. Sij vuäǯǯa veʹrǧǧneeʹǩǩ ǩeeʹrjid še juätkast põʹmmaipååʹšten. Ääʹššest ij taarbaš iʹlmmted Digi- da narodteâttkonttra. Põʹmmaipååšta vuäitt še mäʹcced mååusat.

– Veʹrǧǧniiʹǩǩi vuõltteem ǩeeʹrjid vuäitt vuäǯǯad še juätkast põʹmmaipååʹšten, håʹt-i ääʹššõõđči veʹrǧǧniiʹǩǩivuiʹm digitaalʼlõʹžžen. Vuäitak vaajted Suomi.fi-saaǥǥi šiõttõõzzin ǩeeʹrji tååimtummuš põʹmmaipååšta, ǥu leäk vueʹššen välddam Suomi.fi-saaǥǥid ââʹnnemnalla, vuäʹppast Hotari.  

Lääʹjj viõʹǩǩepueʹttem mâŋŋa Suomi.fi-saaǥǥ  õõʹnnʼjin tåʹlǩǩ 8 % liâ mäccam vuâsttaväʹldded veʹrǧǧneǩpååʹšt põʹmmaipååʹšten. Suomi.fi-saaǥǥi ââʹnnem poddân, rosttovmannu 2017 mâŋŋa, õhttsõʹžže pâi 2 % pukin Suomi.fi-saaǥǥi õõʹnnʼjin liâ mäccam põʹmmaipååʹšt vuâsttavalddjen.

Maanni še kåitta äuʹǩǩõõvvâd muttsest

Suomi.fi-saaǥǥi nõõmâst liâ liikkääm mieʹrrkõõski maannâmsaaǥǥ, koin kåitta šeeʹlled baŋkktobdldõõǥǥid. Vaʹstteei maannmõõžž liâ liikkeʹmmen še järrsi veʹrǧǧniiʹǩǩi de jeeʹres tåimmjeeʹji, mâʹt-a baaŋki, ååsktemõhttõõzzi da operaattori nõõmin. Digi- da narodteâttkoontâr teâđai mieʹldd Suomi.fi nõõmin puõʹtti maannâmsaaǥǥi meäʹrest jiâ leäkku šõddâm miârkteeiʹjes muttâz lääʹjj viõʹǩǩe pueʹttem mâŋŋa.

– Vaʹstteei maannâmsaaǥǥ liâ leämmaš liikkeʹmmen tääuʹjab eeʹjj poddân, leša ååʹn ǥu Suomi.fi-saaǥǥ lij samai ääiʹjpoddsaž kääzzkõs, täid maannmõõžžid teâđast ǩiddee ääiʹbuž jeänab vuâmmšõõzz. Leša kriminaaloummu kåitta pâi äuʹǩǩeed nåkkmin aaʹššin, kook liâ tõn šiâtt muđoi juʹn ääiʹjpoddsaž, ceälkk Hotari.

Staanlaž âânnmõõžž vuäʹppõõzz liâ seämma digikääzzkõõzzâst huõlǩâni, jeäʹl ni kuäʹss čuåkkâl neʹttpååʹštest leʹbe teʹksttsaaǥǥâst puättam liiŋkid, ǥu mõõn kå. kääzzkõʹsse da ǩeeʹrjet kääzzkõõzz addrõs pâi jiõčč neʹttlookki addrõsčokka. Siâzztummuš nääʹll lij ââʹnned mobiilsuåvldõõzz pâi, ǥu nåkam lij vuäǯǯamnalla. Tâʹl jiõk ošvdõõđ addrõõzzâst ouddmiârkkân ǩeeʹrjtemvââʹjj diõtt.

Hotari siâzztââll veʹrǧǧneǩpååʹšt lookkmõʹšše Suomi.fi-mobiilsuåvldõõzz.

– Suomi.fi-mobiilsuåvldõs lij pueʹrmõs nääʹll lookkâd veʹrǧǧniiʹǩǩin puättam pååʹšt. Mõõn lookkâd ođđ saaǥǥ pâi Suomi.fi-mobiilsuåvldõõzzâst leʹbe ǩeʹrjjõõđ addrõõzzâst suomi.fi/viestit. Ij ni kuäʹss õõlǥ mõõnnâd lookkâd saaǥǥid neʹttpååʹštest leʹbe teʹksttsaaǥǥâst puättam liiŋki pääiʹǩ. Suomi.fi-saaǥǥ jiâ ni kuäʹss vuõlttâd teʹksttsaaǥǥid leʹbe WhatsApp-saaǥǥid. Neʹttpååšta puätt iʹlmmtõs ođđ saaǥǥâst, leša tõʹst ij teâttstaan diõtt ni kuäʹss leäkku liŋkk, koon pääkkči čuåkkled, ceälkk Hotari. 

Lââʹssteâđ

Digi- da narodteâttkoontâr, hankintapäällikkö Annette Hotari, [email protected]

• Mõõn pâi lookkâd ođđ saaǥǥ Suomi.fi-mobiilsuåvldõõzzâst leʹbe ǩeʹrjjõõđ addrõõzzâst suomi.fi/viestit. Jeäʹl čuåkkâl neʹttpååʹštest leʹbe teʹksttsaaǥǥâst puättam liiŋkid.
• Suomi.fi-saaǥǥ neʹttpååʹšt -iʹlmmtõõzzin jiâ leäkku liiŋk, Suomi.fi ij vuõlttâd teʹksttsaaǥǥ, WhatsApp-saaǥǥ leʹbe ǩiõrǧǧes-saaǥǥ. Neʹttpååʹšt- iʹlmmtõõzz Suomi.fi puättam saaǥǥ puäʹtte [email protected] addrõõzzâst.
• Veʹrǧǧneeʹǩǩ jiâ ni kuäʹss õõlǥat tåimmad ǩiõrrsest, luõvted teâđaid leʹbe čuåkkled liiŋkid ǩiõrrsest.   
• Jõs joordak maannmõõžž, vuäitak ainsmâʹtted saaǥǥ ǩeʹrjjõõđeeʹl Suomi.fi -saaǥǥid addrõõzzâst suomi.fi/viestit leʹbe ääʹved Suomi.fi-suåvldõõzz.
• Ǩeeʹrjet addrõõzz neʹttlookki addrõsčokka. Jeäʹl mõõn kääzzkõʹsse ooccâm-mašina puåđõõzzi pääiʹǩ.